Tim Cook përpiqet të zvogëlojë varësinë e Apple nga pajisjet dhe të rrisë të ardhurat nga shërbimet

11/10/2019 10:02 PM 0 komente

Hedhjet në treg të produkteve të Apple nuk janë më ato që kanë qenë dikur. Një dekadë më parë, prezantimi iPhone krijoi një entuziazëm të pakufi, aq sa adhuruesit e këtij telefoni do të mbanin radhë përpara dyqaneve që e shisnin këtë produkt, disa ditë përpara afrimit të datës së hedhjes së tij në treg, shkruan The Economist.

Në eventin e fundit të kësaj kompanie, atë të 10 shtatorit, gjithçka dukej njësoj: Bosi i Apple qëndronte në qendër të skenës, i veshur me një bluzë të zezë dhe fliste për risitë e produktit e ri dhe për mënyrën sesi ai do të ndryshonte botën. Por ato fjalë nuk dukeshin më magjike si dikur, magjia e tyre ishte zbehur sepse iPhone 11 duket thjesht si një përmirësim i modeleve që janë hedhur në treg përpara tij. Telefonat inteligjentë janë bërë të mërzitshëm, dhe për këtë shkak shitjet e tyre kanë mbetur në stanjacion.

Situata paraqet padyshim një problem për Apple, i cili e ka ndërtuar suksesin bazë të shitjeve tejet të larta. Edhe përpjekja e fundit, për t’u përqendruar më shumë në shitjen e shërbimeve dhe më pak në shitjen e pajisjeve, është kuptuar gjerësisht. Këto shërbime përmbajnë gjithçka, nga garancitë e zgjatura deri në krijimin e një dyqani ekskluziv të Apple për videolojëra dhe për transmetimin e videove, në të cilën planifikon të shpenzojë 6 miliardë dollarë amerikanë. Ky shërbim është krijuar qëllimisht për të dobësuar rivalë si Disney dhe Netflix.

Hedhja në treg e iPhone 11 tregon se çfarë nënkupton kjo strategji nga ana e harduerit. Çmimet e Apple kanë qenë në një trend rritës për vite me radhë, por tendenca është ngadalësuar. Modeli i iPhone 11 është telefoni me çmim më të ulët që kompania ka hedhur në treg gjatë dy viteve të fundit. Kjo ka kuptim: një kompani e përqendruar në sektorin e shërbimeve ka nevojë për një bazë të gjerë përdoruesish. Ky është një proces shumë delikat. Nëse çmimet bien në nivele shumë të ulëta, firma do të humbasë shkëlqimin e saj për të cilin ka luftuar shumë (iPhone 11 Pro Max do të kushtojë 1,449 dollarë amerikanë).

Në të njëjtën kohë, Apple përfiton nga audienca e saj e “robëruar”. Përdoruesit e telefonave rivalë Android të Google kanë mundësi të shumta zgjedhjeje sa u takon shitësve të pajisjeve hardware, duke krijuar kështu konkurrencë të ashpër të çmimeve. Ata që preferojnë ekosistemin e Apple duhet të blejnë iPhone. Kjo do të jetë ajo që nuk do t’i bëjë çmimet të bien më shumë.

 

 

 

 

Komente

avatar
  Subscribe  
Notify of