Tregu i kozmetikës, shumë shanse te meshkujt

20/11/2012 1:05 PM 0 komente

Në tregun me rritje vjetore prej 6%, aziatikët kujdesen më shumë për lëkurën. Latino-amerikanët kryesojnë në blerjen e deodorantëve

Ndërsa tregu i bukurisë ka hyrë në sezonin e fundit të shitjeve për këtë vit, pritjet më të mëdha janë përqendruar në ato kategori “të gjalla” që gjeneruan vrullin e shitjeve deri më tani, por edhe në fund të vitit të kaluar. Krahas produkteve me performancën më të mirë në kozmetikë, manikyri dhe kremrat kundër rrudhave, produktet e kujdesit për meshkuj edhe një herë kanë ardhur në qendër të vëmendjes dhe kjo duket në përpjekjet që janë shtuar, si për marketingun e tyre, edhe për shtrirjen e ofertave në rrjetin e ofertave. Duke parë efektin e krizës dhe mungesës së stabilitetit ekonomik në tregun botëror të kozmetikës, kategoria e kujdesit për meshkujt ka treguar rritje të qëndrueshme të performancës vitet e fundit. Sipas një studimi të “Euromonitor”, rritja për këtë segment të kozmetikës është 6% në vit që nga 2006-a, duke u mbyllur me rreth 33 miliardë euro në 2011-n.

Tregu po anon te trajtimi i fytyrës me produktet e rrojës, me 51% të shpenzimeve totale të kozmetikës për meshkujt në vitin 2011. Peizazhi po ndryshon gradualisht, me produktet e kozmetikës (kremra) të cilat gjatë pesë viteve të ardhshme pritet të rrisin me dy herë peshën e shpenzimeve të meshkujve për kujdesin estetik.

Deodorantët kryesojnë në produktet e tualetit në vlera absolute dhe për këtë po “ndihmojnë” konsumatorët e tregut të Amerikës Latine. Megjithatë, nëse do të flasim për produktet më dinamike në kozmetikën e meshkujve, kryeson kujdesi për lëkurën. Shpenzimet e meshkujve në këtë drejtim kanë njohur rritje vjetore me dy shifra pesë vitet e fundit dhe duke shtuar me 2 miliardë dollarë vlerën e tregut global të bukurisë që nga viti 2006.

Sigurisht që sjelljet mashkullore lidhur me kujdesin nuk janë homogjene në të gjithë botën. Sipas “Euromonitor”, meshkujt aziatikë janë shumë të orientuar në preferencat e tyre për produktet e kujdesit për lëkurën, ndërkohë që ata brazilianë shpenzojnë më shumë në deodorantë. Ata jo vetëm që kryesojnë tregun botëror për këtë, por, bëjnë dyfishin e shpenzimeve krahasuar me Amerikën e Veriut.

Por, pavarësisht sjelljeve të ndryshme, paqëndrueshmërisë së punësimit (çka mund të frenonte shpenzimet), meshkujt në të gjithë botën i bashkon prirja për ta parë si një aktivitet tërheqës kujdesin për të qenë më të bukur.

Kjo ka përkuar edhe me futjen e shumë produkteve të reja në treg me çmime të ndryshme, duke filluar që nga shampot e adresuara meshkujve deri te produkte specifike, si trajtimi i syve dhe kremrat balsamikë. Për këtë, prodhuesit u frymëzuan nga tregu femëror.
Por, ndërsa një pjesë e konsiderueshme e meshkujve janë të gatshëm t’i kërkojnë produkte të tilla e të shpenzojnë për to, derisa të rrisin kurbën e shitjeve në nivele dyshifrore, ata nuk kanë dëshmuar gjithçka në këtë drejtim.

Në fakt, mund të hiqen disa paralele me industritë e tjera të lidhura të produkteve të konsumit, të cilat na tregojnë se si ka ndryshuar modeli i konsumit. Duke parë tregun e veshjeve për meshkujt, po shënohet një “ringjallje” e kërkesës, aq sa të tejkalojë edhe rritjen e palës femërore. Rritjet më të mëdha të shitjeve vërehen në Korenë e Jugut dhe Kinë. Në këto dy tregje, shpenzimet për dizenjot e veshjeve të meshkujve janë rritur më tepër se në pjesën tjetër ende të plogësht të botës.

Të njëjtat tregje renditen ndër të parët në shpenzimet për kujdesin e lëkurës për meshkujt. Ndaj, ndërsa nuk ka një konfirmim zyrtar të shkruar në formën e një testamenti, me siguri mund të bëhen disa supozime të qarta se si po ndryshon sjellja e klientelës mashkullore kur flasim për blerjet, veçanërisht për segmentin premium.

Studimi i “Euromonitor” mbi konsumin e produkteve kozmetike te meshkujt vëren se shpenzimet e meshkujve në kozmetikë shkojnë përtej produkteve tradicionale. Studimi vëren se te meshkujt e moshës 15-29 vjeç, faktori kyç për të qenë të lumtur është “të qenët i shëndetshëm”.

 

 

 

Komente

avatar
  Subscribe  
Notify of