Shqipëria shfaqet dobët sa i përket mundësive që ofron për burimet kulturore apo udhëtimet e biznesit. Në raportin e fundit të Forumit Ekonomik Botëror pikërisht kjo shtyllë si pjesë përbërëse e indeksit total paraqitet me vlerësimin më të dobët me një nivel pikësh prej 1.2 nga 7 që është maksimumi dhe që paraqet situatën ideale. në këtë shtyllë merren në vlerësim sitet e disponueshme që janë pjesë e trashëgimisë kulturore, artifaktet traditat apo praktikat përfaqësuese kulturore, numri i stadiumeve të mëdhenj, numri i takimeve të mëdha ndërkombëtare si dhe kërkesa dixhitale për turizmin e zbavitjes dhe kulturor.
Edhe në shtyllën burimet natyrore dhe kulturore Shqipëria poaraqitet dobët në vlerësim me vetëm 2 pikë.
Elementi i dytë që shfaqet poshtë mesatares së përgjithshme është ai i transportit ajror dhe konkretisht infrastrukturës për të. Ky është një shqetësim që jo në pak raste është ngritur edhe nga turoperatorët vendas që vlerësojnë se disponibiliteti i vetëm një aeroporti funksional në vend kufizon zhvillimin e turizmit. Konkretisht infrastruktura e transportit ajror është vlerësuar me 2.1 pikë dhe ka parasysh densitetin e aeroporteve, linjat e disponueshme për fluturime, flotat. Treguesi tjetër me një nivel nën mesataren është ai për hapjen ndërkombëtare.
Referuar raportit kjo shtyllë mban parasysh kërkesat për viza, hapjen për marrëveshje ajrore bilaterale, numrin e marrëveshjeve rajonale në fuqi. Infrastruktura në tërësi vlerësohet me një nivel pikësh prej 3 kurse ajo tokësore dhe portuale më vete me 3.1.
Raporti i Forumit Ekonomik Botëror ka bërë vlerësimin në total për 18 shtylla që formojnë atë që njihet si indeks dhe që ka në bazë Konkurrencën në Turizëm dhe Udhëtim për vitin 2019. Nga ana tjetër ashtu sikurse ka shtylla që kanë pasur rezultate të dobëta ka pasur edhe nga ato me një numër domethënës pikësh. Kështu pika më e fortë e gjithë sektorit është siguria me 5.8 ndërsa në vendin e dytë Shëndeti dhe Higjiena me 5.3 po aq sa edhe konkurrueshëmria e çmimeve.
Lidhur me këtë të fundit koha ka treguar se të huajt po dynden drejt Shqipërisë pikërisht sepse është e lirë ndërkohë që një shtrenjtim i çmimeve i vitit 2018 ka bërë që vende si Polonia të hedhin sytë nga tregje të tjera si Turqia apo Greqia. Rënia e këtyre të fundit është reflektuar në numrin e hyrjeve të shtetasve nga Polonia drejt Shqipërisë në 8 muajt e këtij viti.
Shtyllat e vlerësimit të turizmit (1=Keq, 7= Shumë mirë)
Mundësimi i mjedisit 5 pike
Politikat e Udhëtimit dhe Turizmit dhe ofrimi i kushteve 4.3 pike
Infrastruktura 3 pike
Burimet natyrore dhe ato kulturore 2 pike
Mjedisi i Biznesit 4 pike
Siguria 5.8 pike
Shëndeti dhe Higjiena 5.3 pike
Burimet njerëzore dhe tregu i punës 5.1 pike
Infrastruktura e Teknologjisë së Komunikimit 4.7 pike
Prioritarizimi i Udhëtimit dhe Turizmit 5 pike
Hapja ndërkombëtare 2.4 pike
Konkurruehsmëria me çmimet 5.3 pike
Qëndrueshmëria e mjedisit 4.3 pike
Infrastruktura e transportit ajror 2.1 pike
Infrastruktura e porteve dhe tokësore 3.1 pike
Infrastruktura e shërbimeve turistike 4 pike
Burimet natyrore 2.9 pike
Burimet kulturore dhe udhëtimi për biznes 1.2 pike
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.