Udhëtimet jashtë Britanisë do të ndalohen, gjobë 5 mijë paund për shkelësit

23/03/2021 2:38 PM 0 komente

Një gjobë prej 5 mijë paund për këdo që udhëton jashtë Britanisë pa një “justifikim të arsyeshëm”, pritet të futet në fuqi javën e ardhshme, si pjesë e masave të reja anti-Covid.

Masat e reja të udhëtimit janë pjesë e një grupi kufizimesh që qeveria britanike publikoi një ditë më parë. Legjislacioni i hartuar do të votohet nga deputetët të enjten, dhe nëse miratohet, do të hyjë në fuqi të hënën e ardhshme më 29 mars.

Sekretari britanik i Shëndetësisë Matt Hancock tha se kufizimet për të udhëtuar jashtë janë të domosdoshme për të shmangur importimin e një numri të madh rastesh dhe variantesh të reja që mund të vënë në rrezik shpërndarjen e vaksinave.

Ligji thotë, “asnjë person nuk mund, pa një justifikim të arsyeshëm, të largohet nga Anglia për të udhëtuar në një destinacion jashtë saj.”

Ekziston gjithashtu një gjobë 200 paund për mos plotësimin e një formulari të Deklaratës së Udhëtimit, e cila përfshin detaje personale dhe arsyen e udhëtimit për ata që planifikojnë të largohen jashtë.

Kufizimet nuk zbatohen për të udhëtuar brenda zonës së përbashkët, e cila përfshin pjesën tjetër të Mbretërisë së Bashkuar, si Republika e Irlandës, “the Channel Islands”, ”the Isle of Man”.

Përjashtimet nga ndalimi zbatohen kur është “e domosdoshme” që një person të punojë, të studiojë, të marrë pjesë në një funeral apo ceremoni martesore, të përmbushë një detyrim ligjor, të shesë ose të marrë me qira një pronë dhe për disa arsye të kujdesit për fëmijët, mjekësor ose familjar.

Sipas udhërrëfyesit me katër hapa të Boris Johnson, udhëtimi ndërkombëtar pa justifikim të arsyeshëm do të lejohet në Hapin 3, pra jo më herët se 17 maji.

Një ditë më parë kryeministri paralajmëroi se një valë e tretë e rasteve të koronavirusit që po shihet në Francë dhe Itali mund të “arrijë edhe në brigjet tona”.

“Unë pres që ne do t’i ndiejmë ato efekte në kohën e duhur,” tha Johnson duke theksuar nevojën për të administruar shpejt vaksinat me bashkëpunimin ndërkombëtar./Sky News

Komente

avatar
  Subscribe  
Notify of