Zyrtarë të lartë të qeverisë amerikane mbërritën në Shqipëri për të nisur bisedimet me qeverinë për futjen në përdorim të teknologjisë së tyre më të fundit, e cila lidhet me shpërndarjen e gazit natyror me konteinerë, pa pasur nevojë për tubacione.
Me përfundimin e gazësjellësit TAP, Shqipëria po shihet si një vend i rëndësishëm nga Shtetet e Bashkuara për të dominuar tregun e gazit në rajon, e në këtë pikë ambasadorja e amerikane në Tiranë Yuri Kim, tha se kërkohet bashkëpunim në këtë fushë me një partner të sigurtë.
“Është një burim i ri energjie nga një partner i sigurtë, prandaj kemi ardhur në këtë takim edhe me investitorët tanë. Teknologjia jonë virtuale e shpërndarjes së gazit po e gjen rrugën në Europë dhe duhet ta gjejmë këtë rrugë në Shqipëri për të hyrë në treg, duke e bërë vendin tuaj lider në rajon në këtë fushë”.
Përfitimet nga përdorimi i kësaj tekonologjie i numëroi edhe Ndihmës Sekretari për Hidrokarburet në Departamentin Amerikan të Shtetit.
“Ne duam t’iu ndihmojmë për t’u zhvilluar në këtë fushë, duke qenë se jemi 3 nga vendet më të mëdha eksportuese të kësaj lënde. Teknologjia virtuale është shumë lehtë e depërtueshme, ka pak kosto sepse nuk kërkohet ndërtimi i tubacioneve, dhe i jep akses të gjithëve, konsumatorëve dhe automjeteve për t’u furnizuar”.
Ministrja e Infrastrukturës dhe Energjisë tha se vendi ynë është i hapur për të përdorur këtë teknologji.
“Hapja e tregut të gazit për konsumatorët do të ndihmojë ekonominë. Ne do të reflektojmë gjetjet e studimit që kanë të bëjnë me penetrimin e gazit të lëngshëm në Shqipëri”.
Me përfundimin e gazësjellësit TAP, Shqipëria ka një pjesë të rëndësishme në furnizimin me gaz të rajonit. Deri tani agjencitë shtetërore janë duke bërë ofertat finale për blerjen e rezervave të gazit në fushat e Azerbajxhanit dhe po punojnë për projektin e ndërtimit të një tubacion për furnizimin e vendeve të Ballkanit.
Teknologjia e shpërndarjes me gaz përmes konteinerëve është një nga alternativat që po studiohet si për të furnizuar tregun vendas ashtu dhe atë rajonal. Futja në operim e TAP në fund të këtij viti heq varësinë që kishte prej dekadash nga gazi rus Europa Perëndimore.
Tv Klan
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.