Kur bëhet fjalë për të qenë të lumtur, studimet thonë se të kesh ndikim dhe të fitosh respektin e të tjerëve vlen më shumë se paratë.
Në një studim të kryer në Haas School of Business të Universitetit të Kalifornisë, psikologu Cameron Anderson dhe bashkautorët e tij, ndoqën studentët e MBA, para, gjatë dhe pas përfundimit të programit të tyre dhe gjetën se statusi social është një tregues më i madh i lumturisë se sa paratë.
Nëse doni t’ju shohin më me respekt në punë, ekspertët e karrierës thonë se të bëni disa ndryshime mund t’ju ndihmojë shumë.
Më poshtë janë katër gjëra që duhet të bëni që të fitoni respektin e të tjerëve në punë.
1. Email-e koncize
Drejtuesit i kushtojnë vëmendje mënyrës se si ju komunikoni. Nëse njiheni si një person që shkruani email-e të gjata ose mesazhe të gjata me shumë gabime, njerëzit nuk do t’ju marrin seriozisht.
“Ngadalësoni ritmin, – thotë Vicki Salemi, eksperte karriere në platformën e punës Monster. – Merrni frymë. Bëni një pauzë”.
Julie Sweet, CEO e kompanisë 16 miliardë dollarëshe Accenture North America, thotë se drejtuesit i kushtojnë vëmendje mënyrës se si punonjësit komunikojnë nëpër email-e. Megjithëse Sweet është një drejtuese e lartë, çdo vit ajo përpiqet të përmirësojë aftësitë e saj të komunikimit.
Nëse mund të ndërtoni një reputacion për email-e të qartë, të shkurtër dhe pa gabime do të jetë në të mirën tuaj. Email-et me gabime thjesht ju prishin imazhin.
Sipas të dhënave të mbledhura të Monster nga 943,000 vende pune në treg, të jesh në gjendje të komunikosh mirë është një ndër aftësitë “soft” që kërkohet nga punëmarrësit.
2. Dyshime të vazhdueshme te vetja
Studimet thonë se emocionet janë ngjitëse. Kështu që nëse ndiheni me pak vetëbesim – të tjerët do ta vënë re. Brian Wong, një sipërmarrës 26-vjeçar i cili punon në kompani si Pepsi dhe McDonald’s, thotë se vetëbesimi është i rëndësishëm në ndërtimin e një reputacioni të mirë.
“Mendimi se njerëzit nuk do t’ju marrin seriozisht para se të hyni në bisedë – është një nga gabimet më të mëdha që mund të bëni në karrierën e hershme”, – thotë Wong.
Nëse nuk ndiheni të sigurt, kushtojini vetes pak kohë për të përmirësuar imazhin. Jenny Blake, ish-ekspert karriere në Google, nxit profesionistët që të krijojnë “formulën e tyre të lumturisë” dhe të gjejnë pak kohë gjatë javës që ta praktikojnë atë. Të kujdesesh për veten – përkthehet në më shumë besim në punë – thotë ajo.
Ndërkohë që zhvilloni besimin në vete, përdorni gjuhën e trupit në mënyrë që të bëheni më të vetëdijshëm – thonë ekspertët e karrierës, si për shembull të qëndruarit drejt, si dhe të merrni frymë gjatë kohës që flisni.
3. Performanca në punë
Mosrespektimi i afateve ose performanca e dobët në punë mund të dëmtojë reputacionin tuaj profesional në punë, gjë që mund t’ju çojë deri në pushim nga puna. Një studim i Universitetit të Kalifornisë, San Francisko, thotë se ata që kanë vështirësi në të thënët “jo” kanë më shumë gjasa të shfaqin devijime psikike, madje edhe depresion.
Miliaderi Warren Buffet thotë: “Ndryshimi midis njerëzve të suksesshëm dhe njerëzve vërtet të suksesshëm është që njerëzit vërtet të suksesshëm u thonë ‘jo’ pothuajse çdo gjëje”.
Ndërkohë që ju nuk doni thjesht t’i thoni “jo” shefit tuaj, duke e pyetur se cila është puna më e rëndësishme, do t’ju ndihmojë në reduktimin e stresit. Në këtë mënyrë ju do të bëni atë çka ai kërkon dhe ndërkohë të mund të shprehni ngarkesën që keni në punë.
Pasi ju të keni përcaktuar prioritetet tuaj, ju jo vetëm do të përfundoni punën tuaj, por edhe do të përmbushni pritshmëritë dhe kjo është një nga mënyrat më të mira që ju të ngriheni në detyrë.
“Të ngrihesh në detyrë nuk do të thotë thjesht të bëni punën tuaj” – thotë Suzy Welch, bashkëpunëtore në CNBC dhe autore librash– do të thotë të rimendosh mënyrën se si po e bëni punën tuaj”.
4. Marrëdhënia me të tjerët
Edhe pse mund të jetë e lehtë të ulesh gjithë ditën para kompjuterit dhe të punoni, të dilni nga zona e konfortit dhe të bëni një përpjekje për të kontaktuar me të tjerët, mund t’ju ndihmojë në rrugën tuaj të suksesit.
Sipas një studimi të Gallup, njerëzit të cilët kanë marrëdhënie të mira me drejtuesit – kanë më shumë gjasa të ndihen të angazhuar dhe të rëndësishëm në punë. Shawn Achor, kërkues dhe autor librash bestseller, thotë se njerëzit që tregojnë “mbështetje sociale” ndaj të tjerëve, ndihmojnë edhe veten në rrugëtimin e suksesit. Ata që nxisin angazhimin në mjedisin e punës kanë 40 për qind më shumë mundësi të ngrihen në detyrë – shkruan ai në librin “The Happiness Advantage”.
*Marguerite Ward
Burimi: CNBC