Biznesi, kundër rritjes së pagës minimale: Nuk jemi konsultuar, shtohen kostot, do të shkurtojmë punonjësit

02/03/2020 11:02 PM 0 komente

Biznesi fason e konsideron arbitrar dhe të pakonsultuar vendimin për rritjen e pagës minimale në 30 mijë lekë në janar të 2021. Flori Zekja, përfaqësues i Shoqatës së Fasonëve, tha për “Monitor” se vendimi do të ndikojë edhe te punësimi.

“Është rritje artificiale. Më e rëndësishme për sektorin fason është bërja e reformës për kategorizimin e punëtorëve. Duhet të bëhet një kategorizim për profesionet. Rritja e pagës minimale do të ndikojë në mosmarrjen  e punonjësve të rinj. Nuk do të marr punëtor të ri, pasi nuk mund ta paguaj 30 mijë lekë pa përvojë”, tha Zekja.

Rritja e pagës minimale do të shtojë kostot edhe për industrinë e prodhimit dhe eksportit dhe do të ulë të ardhurat e punonjësve. Alban Zusi, President i Qendrës të Eksportuesve Shqiptarë,  tha për “Monitor” se nëse  rritja bëhet për efekte sociale, qeveria të kompensojë njerëzit me paga të ulëta, pa rritur kostot e biznesit.

“Në përgjithësi jam për të mos pasur ndërhyrje administrative në ekonominë e tregut, sepse në momentin që i përcakton pagat, qoftë edhe atë minimale, shteti ka ndërhyrë në treg.

Në kuadrin e një veprimi social mund të bëhet, por do të duhet të bëhet duke iu hequr detyrimin kësaj kategorie që të paguajë tatimin për të ardhurat.  Të rritet fasha e pagave me tatim zero, të hiqet tatimi mbi të ardhurat për pagat deri në 50 mijë lekë.  Kjo do të krijonte ekuilibër  të biznesi me qëllim që të mos rriten kostot.

Nëse rriten kostot e biznesit, bëhet më pak konkurrues, nuk hapen vende të reja të punës, ka më pak investime”, shprehet Zusi.

Kreu i Shoqatës të Eksportuesve Shqiptarë thotë se rritja e pagës minimale shton kostot për punonjësit me rroga të ulëta.

“Ata që nuk kanë rentabilitet në punë, pra që nuk e kapin me punën e tyre pagën 30 mijë lekë ka mundësi që të shkurtohen nga puna. Shton kostot te fasha e punëtorëve me rroga të ulëta. Rrit kostot e biznesit, në të njëjtën kohë ul edhe të ardhurat e punonjësit, pasi duket sikur po ia rrit, por një pjesë e sigurimit shoqëror që do ta paguajë punonjësi do të rritet.”

Si do ndryshojnë kontributet dhe sigurimet shëndetësore

Kryeministri Rama tha më herët se në vitin 2021, paga minimale do të rritet 4 mijë lekë, pra do të jetë 30 mijë lekë. Rritja do të jetë rreth 15%.

Rritja e pagës minimale deri në 30 mijë lekë do të vazhdojë të mbajë të paprekur këtë kategori nga tatimi mbi të ardhurat. Tatimi mbi të ardhurat për rrogat deri në 30 mijë lekë është zero.

Rritja e pagës minimale do të rrisë kontributet e sigurimeve shoqërore dhe shëndetësore. Me pagën minimale 26 mijë lekë në total paguhen 7,254 lekë kontributet e sigurimeve shoqërore dhe shëndetësore.

Pagesat e kontributeve të detyrueshme dhe sigurime shëndetësore llogariten 27.9 % pagës. Nga kjo shumë, 24.5% paguhen për sigurime shoqërore, si sigurime për sëmundje, barrëlindje, pensione, aksidente dhe papunësie. Pjesa tjetër prej 3.4 për qind është për sigurime shëndetësore.

Me pagën e re minimale do të paguhen 8.370 lekë kontribute, apo 1.116 lekë më shumë.

Rritja e pagës maksimale

Rritja e rrogës minimale nënkupton edhe rritjen e pagës minimale. Në 2019, paga maksimale në shkallë vendi u rrit 8.3%, duke shkuar në 114,670 lekë, nga 105,850 lekë që ishte më parë, me një rritje prej 8.820 lekë.

Sipas ligjit, paga maksimale rritet në të njëjtat nivele si paga minimale. Nga ndryshimet do të preken edhe rrogat maksimale. Nëse rritja e pagës minimale do të jetë rreth 15%, rroga maksimale do të jetë 131,870 lekë.

Burimi: INSTAT, Min Financave

Komente

avatar
  Subscribe  
Notify of