Si të nxjerrësh në shitje një pronë

08/10/2012 9:59 AM 0 komente

Në kushtet e një ekonomie të “ftohtë”, shitja e një prone është më shumë se një sfidë, pasi askush nuk do të dëshironte, që për shkak të mungesës së parave, të merrte më pak nga sa ajo mund të vlente në të vërtetë. Por, nëse kjo shitje është e “pashmangshme”, ose mund të shtyhet edhe për më vonë, atëherë ndoshta është e udhës që të njiheni me disa aspekte të dobishme, që mund t’ju ndihmojnë në rritjen e vlerës së pronës që dëshironi të shisni, që kryesisht mund të jetë një shtëpi

 

Në “derën” e agjentit

Në radhë të parë duhet të keni parasysh se është më e udhës që për të përmbushur pritshmëritë, t’i drejtoheni agjentëve të specializuar të pasurive të patundshme. Natyrisht që në këtë transaksion, ata do të mbajnë tarifën për shërbimin e tyre, por prona juaj nuk rrezikon të mbetet e pavlerësuar. Si për çdo vendim të rëndësishëm që përfshin paranë, edhe në këtë rast, është mirë që të “hidhni një sy rrotull” dhe të merrni informacionin e mjaftueshëm. Gjithashtu është e rëndësishme që të dëgjoni se çfarë kanë për të thënë, pasi janë ata që i njohin “hiletë” e zanatit. Inxhinierja Xheni Jahja, drejtuese e agjencisë “Tirana Real Estate”, na njeh me mënyrën dhe procedurën që ndiqet për të nxjerrë një pronë në shitje, e që në rastin tonë është një apartament.

Gjëja e parë që agjenti bën pasi klienti është paraqitur në agjenci dhe i ka shprehur vendimin për të nxjerrë në shitje pronën e tij, e regjistron atë. Është agjenti ai që plotëson të dhënat e pronës, merr informacion të zgjeruar për mënyrën sesi kërkohet të shitet, kushtet në të cilat gjendet, dokumentacioni etj. E më pas është radha që klienti të dëgjohet për çmimin e shitjes, thotë ing. Jahja. Agjencitë pranë tyre kanë agjentë të licencuar si vlerësues të pasurive të paluajtshme, ndaj dhe klienti këshillohet për çmimin nëse ai është i lartë për tregun, merr një çmim të dytë, por nëse është i ulët, oferta konsiderohet “okazion”. Sipas drejtueses së kësaj agjencie, një nga problemet kryesore që has tregu ka të bëjë me ekzistencën e agjentëve të pakualifikuar, ndaj dhe në këtë rast këshillohet të bëhet kujdes. Një tjetër fenomen që vihet re është edhe ai i çmimit të mbivlerësuar që prezanton klienti. Agjentët thonë se një pronë me çmim të lartë shitjeje kërkon më shumë kohë për t’u reklamuar dhe mbi të gjitha, kërkon blerës potencialë.

Hapi tjetër që ndërmerret ka të bëjë me investigimin fizik që agjentët imobiliarë i bëjnë pronës, me foto dhe dokumentacionin përkatës e nëse vihen re keqkuptime, plotësohet informacioni i marrë në zyrë.

Më pas nis publikimi i ofertës, në faqet zyrtare të imobiliarëve në Shqipëri. Janë afërsisht tetë faqe të tilla aktive, por nuk mungojnë edhe ato ndërkombëtare. Agjentët përdorin edhe këtë kanal komunikimi. Drejtuesja e agjencisë thotë se, nëse prona ka kërkesë aktuale i prezantohet blerësve potencialë që ajo ka në bazën e saj të të dhënave, në të kundërt, priten komentet e të interesuarve.

 

Të jeni realistë

Një nga “çelësat” e realizimit me sukses të një transaksioni shitjeje është pikërisht reklamimi, por edhe të qenit transparent dhe i ndershëm me blerësin e mundshëm. Këshilla kryesore që japin agjentët është që çmimi të jetë sa më real. Inxhinierja Jahja thotë se klientët duhet të jenë edhe fleksibël, negociatat nuk duhet të “hidhen në erë” për diferenca të vogla.

Çmimi i shtëpisë është ai që është në momentin kur ju nisni negociata dhe jo ai që shiti një shoku juaj para dy vjetësh. Ju duhet ta shikoni shitjen e apartamentit me syrin e blerësit për të qenë sa më realist. Mbi të gjitha, duhet të merrni në konsideratë edhe se çfarë kërkojnë blerësit në kohën që ju shisni apartamentin, për shembull: ata kërkojnë që apartamentet të kenë hipotekë, që të mos kenë detyrime faturash të papaguara.

Kur të vendosni çmimin, mendoni që të kenë përparësi dhe argumentet që ju jepni dhe jo vetëm një numër i vendosur për pak kohë. Mos harroni që blerësit kanë informacion të shumtë krahasues rreth pronave në shitje, ndaj ata që sot blejnë një pronë (apartament, dyqan, tokë etj.) nuk e bëjnë aspak me sy mbyllur.

 

Të reklamoni pa gabime

Shtëpia e nxjerrë në shitje duhet të jetë gati për përdorim. Ju nuk duhet t’i lini blerësit asnjë arsye që t’ju thotë “jo”. Është vërtetuar që blerësit nuk blejnë shtëpi që ka nevojë për shumë riparime, vetëm nëse është një okazion i vërtetë.

Nxiti njerëzit që ta blejnë shtëpinë tënde dhe mos u tregoni indiferentë.

Ka shumë rëndësi edhe mënyra se si ju e reklamoni pronën që po nxirrni në shitje, e që në këtë rast mund të jetë një apartament. Inxhiniere Xheni Jahja thotë se, në radhë të parë, është e rëndësishme që apartamenti të pasqyrohet mirë, të fotografohet çdo dhomë dhe me detaje, që klienti të jetë i qartë që në çastin kur ndodhet te agjencia, nëse do të preferojë që ta shikojë nga afër ose jo.

Ajo thotë se në momentin kur agjenti nis investigimin dhe fotografimin, apartamenti duhet të jetë i ndriçuar, të jenë hapur të gjitha dritat, grilat etj.

“Që prona të shitet shpejt, unë i këshilloj klientët të investojnë sado pak në të, ta rilyejnë apartamentin me ngjyra të ngrohta, mundësisht në të bardhë, të bëhen riparimet e nevojshme. Sikur mobiliet e gatimit të bëhen në ngjyrë të bardhë, gjë që nuk kërkon shumë investim, kjo do të ketë një tjetër ndikim te blerësi. Natyrisht, askush nuk dëshiron që të shpenzojë para për një shtëpi që është duke u përgatitur për t’u shitur, por kjo mund të jetë vendimtare, nëse synohet që shtëpia të shitet shpejt dhe me çmimin e dëshiruar”, thotë ing. Jahja.

Sipas saj, në momentin e shoqërimit të blerësit të mundshëm është i rëndësishëm ajrimi dhe ndriçimi maksimal i apartamentit, pasi klienti duhet të marrë pamjen e plotë të apartamentit.

Mbi të gjitha, thotë ajo, nuk duhet “plaçkitur” apartamenti në rastin kur nxirret në shitje, pasi mund të krijohet një imazh aspak i këndshëm.

Pas shumë ndryshimeve dhe rregullimeve që i keni bërë apartamentit që do të nxirrni në shitje, mendoni se si mund të inkurajoni blerësin, Tregohuni bashkëpunues.

 

Domosdoshmëria

Natyrisht, askush nuk dëshiron që të shpenzojë para për një shtëpi që është duke u përgatitur për t’u shitur, por kjo mund të jetë vendimtare, nëse synohet që shtëpia të shitet shpejt dhe me çmimin e dëshiruar

 

Këshillë: Ju duhet të tregoheni tolerant apo të plotësoni kërkesat për hyrjen në apartament. Po ashtu, tregoni se jeni i gatshëm të negocioni në çështje të ndryshme që nuk ju dëmtojnë gjatë shitjes së apartamentit

 

Komente

avatar
  Subscribe  
Notify of