Më shumë sesa programe surprizë, sezoni i vjeshtës në televizionet shqiptare i ngjan një merkatoje të ethshme lëvizjesh imazhesh, sa nga njëri stacion te tjetri. Ka pak prodhime të reja, ndërsa të tjerat vazhdojnë rrugëtimin disavjeçar. Por, kjo periudhë e vitit nuk ka qenë aspak pozitive sa i përket reklamimit. Ekspertët parashikojnë rimëkëmbje të këtij segmenti në fillim të vitit të ardhshëm
Nga Elona Bedalli
Lëvizje të befta, surprizë dhe që kanë shkaktuar jo pak diskutime në median vizive shqiptare. Flitet për një merkato figurash qendrore që kanë qenë ndër më të ethshmet e viteve të fundit. Ujërat janë “turbulluar” disi nga një stacion i ri që ka nisur rrugëtimin mediatik dhe që ka “thithur” në gjirin e tij jo pak personazhe nga konkurrentët. Ajo që mund të thuhet është se gjatë këtij sezoni në televizionet kryesore do të shihen më shumë programe “deja vu” sesa të reja e këtu fajin nuk e ka vetëm kriza, por edhe sepse të prodhosh çdo herë diçka tërësisht origjinale është e vështirë. Ka pak që televizionet kanë zbuluar disa nga “ushqimet” shpirtërore që do t’i servirin publikut, por ka të tjera që priten të shfaqen. Nga promot që janë shfaqur deri tani në ekranin e vogël është kuptuar se tematika nuk do të ndryshojë shumë nga sezoni i kaluar. Konkurrenca nis në orët e zgjimit dhe arrin kulmin në “prime time”, koha kryesore ku audienca shënon rritje të ndjeshme.
Të tria televizionet kryesore “Top Channel”, “TV Klan” dhe “Vizion Plus” kanë rifreskuar strategjitë për të thithur shikueshmërinë e grupmoshave 14-49 vjeç (standardi ndërkombëtar). Investimet nuk janë më aq në nivelet e dikurshme, pasi kriza financiare vazhdon dhe të bësh televizion, kushton jo pak. E për më tepër që reklamat po njohin nivelet më të ulëta, sikundër konfirmojnë edhe ekspertët. Ndaj për televizionet, përballimi i kostove të prodhimit është një sfidë që vështirë se është fituar. Megjithatë, për tregun e reklamave, ekspertët thonë se “diçka” do të lëvizë, se do të nisë disi gjallërimi parë kjo edhe nga planifikimi i buxheteve që kompanitë private të sektorëve kyç kanë bërë. Sipas ekspertëve, rënia e buxhetit të reklamave është një arsye e mjaftueshme që televizionet të mos ndërmarrin investime të palogjikshme, qoftë kjo edhe në emër të audiencës, që për më tepër nuk arrin dot të matet me metoda shkencore, edhe pse ka përpjekje sporadike. Kjo tendencë ka diktuar edhe strategjinë e mosrritjes drastike të çmimeve për spotet publicitare.
Ndjesi italiane e britanike në ekranin e vogël
Të pasionuarit pas televizionit kanë filluar të njihen dalëngadalë me atë se çfarë kanë planifikuar që të servirin për gjatë gjithë sezonit vjeshtë-dimër. Jo gjithçka do të dalë në skenë brenda këtij viti, pasi ka programe që do të nisin të transmetohen edhe me fillimin e 2014-s. Rregulli kryesor është se në këtë industri, asgjë nuk mund t’i lihet rastësisë, pasi duhet të kurohen shijet e audiencës, por shërben edhe si njësi matëse për bizneset që duan ta edukojnë me këshilla shikuesin. Tashmë media vizive është konsoliduar në Shqipëri dhe mund të krahasohet fare mirë me ato të vendeve të tjera, por i padiskutueshëm është fakti se gjithnjë e më shumë po ndihet “dora” kurative mjeshtërve italianë. Drejtoresha e programacionit në “Top Channel”, Vjollca Dedei, thotë se: “Kjo ka të bëjë me disa komoditete, e para ata njihen për stilin e veçantë në prodhim; e dyta na përshtatet më së miri. Kemi shumë gjëra të përbashkëta në mentalitet dhe kjo ndihmon në komunikim. Jemi afër me njëri-tjetrin për të dhënë dhe marrë. Edhe televizionet e tjera i referohen shpesh bashkëpunimit me autorë italianë, që duhet ta pranojmë se janë mjeshtër të spektakleve”, thotë zonja Dedei.
Ndërsa patentat ndërkombëtare janë programe që janë testuar si të kenë pasur sukses në Europë apo edhe në Shtetet e Bashkuara të Amerikës, hedhja e tyre në tregun shqiptar shihet edhe si një garanci më shumë për reklamuesit.
Nga ana tjetër, programacioni është i vetmi produkti që rrjetet televizive iu “shesin” konsumatorëve (audiencës televizive) dhe klientëve (reklamuesve) gjithashtu. Këtu dallohet prirja për t’u orientuar më tepër drejt formateve të tipit reality-show, si dhe atyre që kanë mundësi të gjenerojnë në një shkallë të konsiderueshme ndërveprimin e audiencës me televizionin.
Megjithatë, ajo që mund të thuhet pa droje është se do të vazhdojnë të mbizotërojnë në pjesën më të madhe të programacionit (ditor/javor) të televizioneve, formatet e telenovelave, që përgjithësisht kanë një kosto relativisht më të ulët se programet e tjera, me kërkesa më të larta për burime financiare, teknike e njerëzore, por edhe ato të tipit “info talk-show”. Kushtet aktuale të tregut televiziv dhe zhvillimet e mëtejshme të shijeve të audiencës do të ndikojnë përherë e më tepër në konsolidimin e disa televizioneve, të tipit gjeneralist, ndërkohë që shumica e rrjeteve/kanaleve të tjera do të duhet që të orientohen drejt formateve “niche” të programacionit, pasi nuk do të jenë në gjendje të konkurrojnë me rrjetet kryesore.
Në vetvete, kjo nuk është një dukuri negative, duke gjykuar se ka mjaft grupe të caktuara demografike (dhe shije/sjellje të caktuara të audiencës) që nuk mund të plotësohen domosdoshmërisht nga kanalet kryesore të formatit gjeneralist.
“Top Channel”, pak nga gjithçka
Një pjesë e mirë e programeve që kanë krijuar traditë vazhdojnë të jenë në ekranin e “Top Channel” për shikuesit e saj, si “Wake up”, “Selekt”, “Shqip”, “Top Story”, “Procesi Sportiv”, “Top Show”, “Exlusive” dhe natyrisht “Portokalli”, që mbush dhjetë vjet transmetim. “The Voice” do të jetë sërish në kërkim të zërit më të mirë. Siç thotë drejtoresha e programacionit në “Top Channel”, Vjollca Dedei, e premtja, e shtuna dhe e diela do të sjellin për publikun tri lloje programesh që i përkasin një target-grupi të ndryshëm. I pari është garë e talentit, e shtuna do t’i dedikohet kinemasë shqiptare (“Kinemaja ime”), i treti, show i humorit. Sjellja në ekranin e vogël e prodhimeve të fundit shqiptare është një format i provuar edhe më parë nga “Top Channel”, por znj. Dedei thotë se që nga ajo kohë kanë kaluar tre vjet dhe jepet rasti që të përfshihen edhe prodhime që nga edicioni i kaluar mund të kenë mbetur jashtë. Po kështu “Tjetri” do të zëvendësohet nga një emision i ri që quhet “Divided” (ose në shqip “Për vete”). Është një game show ku tre persona luajnë për të fituar para e që në fund duhet t’i ndajnë mes tyre. Ky është një format që është testuar në disa vende europiane.
Transmetimi i programeve shumëorëshe nisi me “E diell” që këtë herë mban firmën e një autori italian të njohur për produksionet në “Rai” dhe “X Factor”. “Nga ana tjetër, duhet të theksoj se ne jemi duke ringritur të gjitha ‘teatrot’ tona në ambiente të reja, ndaj nuk është e thjeshtë që të adoptohen shpejt të gjitha skenografitë. Për hir të kësaj, mund të them se do të nisë së shpejti ‘E Diell’. Tre do të jenë prezantuesit, Arbana, Xhemi dhe Ledioni. Unë do ta lë që ta gjykojë publiku, por di të them se ‘Top Channel’ di të tërhiqet në kohë kur kupton se një gjë nuk ecën, e forcon dhe më pas e rihedh në treg” thotë znj. Dedei.
E meqë jemi te “tërheqja” sikundër u përfol tashmë, është zyrtare, nuk do të ketë një sezon të ri të “Big Brother Albania”, të paktën jo tani shpejt. Nuk ka asnjë keqardhje, pasi siç komentohet do të zëvendësohet me prurje të re, me një show tërësisht të ri, i një natyre krejt tjetër e që quhet “Master Chef”. Një spektakël që i përket botës së kulinarisë dhe ka vetëm tre vjet që është në treg. Televizionet italiane gjithashtu e kanë testuar në mënyrë të suksesshme, por me një titull tjetër “La terra dei cuochi”. Zonja Dedei thotë se është një investim i madh që bashkon amatorë të kuzhinës nën gjykimin e tri shefave të ndryshëm të kuzhinës. E kjo zgjedhje nuk bëhet vetëm për të tërhequr audiencën femërore, por të gjithë ata që janë të pasionuar pas kulinarisë. “Jemi përpjekur të shkojnë nga një spektakël i madh në një tjetër po të tillë. Kishim ‘Big Brother’, me një nuhatje të veçantë morëm ‘The Voice’ dhe pastaj ‘Master Chef’. Secili prej tyre ka vendin e vet. Nuk ka asnjë keqardhje, pasi ky i fundit është një spektakël për të gjithë. Me këtë sezon, ne po përpiqemi që të kemi shumëllojshmëri programesh, talente, quiz-e, humor etj., kinema, maratonë live”, thotë znj. Dedei.
E pavarësisht këtyre, është e pamundur që televizioni të mbetet jashtë ndikimit të krizës financiare. Dhe kjo ndihet. Për t’i bërë ballë një strategjie, që është zgjedhur, është pikërisht ajo e të prodhuarit me një staf të vogël, por pa hequr dorë nga cilësia. Nga drejtuesit e programacioneve nuk kalojnë pa u komentuar edhe largimet apo prurjet e imazheve sa nga njëri stacion në tjetrin. “Këto janë zgjedhjet personale që bëjnë vetë personazhet. Mund të na vijë keq për ikjet, por ama kjo nuk do të thotë se puna ndalon. Talentet nuk mbarojnë, prandaj nuk mund ta konsideroj si diçka negative. Kjo është një zgjedhje personale. Televizioni është një industri që realizohet në grup. Nëse nuk e ke stafin, atëherë individi nuk mund të shkëlqejë. Është grupi që e bën tërësinë të funksionojë”, thotë znj. Dedej.
“TV Klan”, i besohet sërish muzikës
Televizioni tjetër kombëtar, edhe këtë sezon ka vendosur që si kryefjalë të ketë “muzikën”, duke qenë se ka disa formate bazë të saj. E diela me “X Factor” vazhdon rrugëtimin për të tretën herë, sërish nën garancinë që japin emrat si Vera Grabocka apo Alketa Vejsiu.
Duke filluar nga ky muaj, në arenën e “TV Klan” do të ngrejë siparin një spektakël që vjen si një ide origjinale dhe titullohet “Musical MuziKlan”. Drejtuesit e programacionit të këtij televizioni thonë se veprimi dhe ngjarja e një muzikali do të vijë në skenë nëpërmjet fjalës së aktorit, por në mënyrë të veçantë nëpërmjet muzikës, këngës, vallëzimit. Spektakli është më shumë një komedi brilante ku prezantohen copëza muzikore, këngë të muzikës xhaz dhe pop rok, nën një orkestrim shumë elegant”, thonë drejtuesit e programacionit. Sipas tyre, çdo muzikal premtohet të jetë një spektakël më vete sa i takon kostumeve, skenografisë, regjisë, aktorëve dhe këngëtarëve.
Një tjetër emër i rëndësishëm i këtij ekrani e ka nisur tashmë spektaklin e tij. Ardit Gjebrea sërish i vetëm, por me bashkëskenaristen Dalina Buzi. Blendi Fevziu me “Opinion” ka hapur siparin e emisioneve të tij e po kështu edhe Arian Çani me “Zonë e Lirë” dhe Rudina Magjistari me “Takimi i pasdites”. Duket se “motorët” e “TV Klan” janë ndezur.
Edhe këtë sezon nuk do të hiqet dorë nga serialet turke, duke vazhduar traditën që nisi dy vite më parë, si një tendencë që u vu re në vendet e Ballkanit. Duket se tashmë këto seriale kanë rrëzuar nga “piedestali” telenovelat spanjolle dhe braziliane. Shumë shpejt pritet të nisë versioni turk i “Shtëpiake të dëshpëruara”, por edhe “Forbidden Love”.
Për drejtuesit e departamentit të programacionit, formatet që prezantohen në këtë sezon sigurojnë një aspekt tepër të rëndësishëm për televizionin që është interaktiviteti apo ndërveprimi i drejtpërdrejtë i audiencës. Sipas tyre, sa më i lartë të jetë ky ndërveprim, aq më e lartë është shkalla e suksesit në këndvështrimin e produktit që u ofrohet konsumatorëve (audiencës) dhe sidomos, klientëve të medias (reklamuesve). Kjo rrit edhe mundësinë për të qenë të suksesshëm. Mëngjesi vazhdon nën shoqërinë e “Aldo Morning Show”, me formulën e njëjtë: humor, batuta, telefonata. Lidhje direkte dhe informacione urbane, por jo lajme.
“Vizion Plus”, rrit konkurrencën
Sezoni ka nisur tashmë edhe për “Vizion Plus”. Prodhime të reja, por edhe programe që vazhdojnë udhëtimin nga sezonet e kaluara. Drejtuesit e këtij televizioni thonë se ky sezon ka në brendësi të tij më shumë përgjegjshmëri, në respekt dhe vlerësim ndaj audiencës që ndjek. “Jemi të ndërgjegjshëm për faktin se konkurrenca sa vjen e bëhet edhe më fortë dhe natyra e audiencës gjithnjë e më komplekse, ndaj duke u fokusuar tek pikat tona të forta dhe duke marrë në konsideratë pikat e dobëta, do të na shërbejnë të forcojmë pozitat në treg dhe njëkohësisht të identifikojmë segmente të reja në të”, thonë drejtuesit e programacionit të këtij televizioni. Sipas tyre ka disa shtylla mbi të cilat është ndërtuar strategjia e këtij sezoni. Diversiteti ka të bëjë me formate të konceptuar dhe të ndërtuar për target-grupe të ndryshme, me shpërndarje ditore konform kërkesave dhe nevojave të publikut. Në këtë sezon të ri, një element i rëndësishëm mbi të cilën është ndërtuar edhe e gjithë fushata promocionale, janë imazhet e reja dhe të vjetra të “Vizion Plus”, si Agron Llakaj, Agim Bajko, Fjodora Fjora, Anila Çela, aktorët e “Apartamentit 2XL”, por edhe prurjet e reja si Nolian Lole e Pranvera Borakaj dhe dy spikerët e rinj Arsen Hoxha e Mira Kazhani. Edhe blerjet ekskluzive shihen si një pikë e fortë. UEFA Europa League dhe “Dancing with the Stars 4” janë më të rëndësishmit. Drejtuesit e programacionit thonë se komunikimi është gjithashtu shtyllë kryesore. “Formatet tona janë larg banaliteteve, batutave shterpe apo humorit bajat. Kemi qenë dhe mbetemi gjithnjë të kujdesshëm për të ofruar cilësinë dhe sasinë e duhur të informacionit, duke pasur gjithnjë parasysh se vështirësia më e madhe nuk është gjenerimi i audiencës, por mbajtja e saj”, thonë drejtuesit e programacionit.
Në krye të listës së formateve qëndron edicioni i katërt i “Dancing with the Stars Albania”. Një patentë ndërkombëtare e “BBC Worldwide”. Për 12 javë me radhë, 12 personazhe VIP shoqëruar nga 12 balerinë profesionistë do të rivalizojnë njëri-tjetrin në një garë ku kryefjala do të jetë kërcimi.
Vazhdon rrugëtimi për “Al Pazar”, një tjetër show i cili në premierën e tij sezonale tërhoqi jo pak vëmendjen e audiencës. Ai ngriti siparin më 5 tetor e do të vijojë çdo të shtunë në mbrëmje. “Apartamenti 2XL” gjithashtu nuk mungon për shikuesin. I gjithë spektakli zhvillohet brenda një apartamenti të improvizuar, ku banorët e tij presin e përcjellin miq të ftuar që u përshtaten situatave të ndryshme që vihen në skenë. Me nisjen e tij më 6 tetor, ky show plotëson dozën e humorit që injekton në fundjavë “Vizion Plus”. Një tjetër e re e këtij sezoni është riformatimi i programit të pasdites. Jo më “Ora 5PM”, por “Vizioni i Pasdites”. Do të jenë dy moderatorë, ndërsa formati ndryshon rrënjësisht strukturën dhe formën. Për herë të parë ky emision vjen si një paketë e plotë kushtuar familjes.
Edhe mëngjesi ka ndryshuar. Nuk është më “Zip”, por “7 pa 5”. Moderohet nga Pranvera Borakaj dhe Nolian Lole dhe vjen si një revistë me tema të ndryshme që lidhen me dukuri e pjesë të jetës së përditshme. Edhe edicioneve të lajmeve u janë shtuar figura të reja, ndërsa stafi informativ tashmë është nën drejtimin e gazetarit Lutfi Dervishi.
Do të vazhdojnë të mbeten pjesë e strukturës programore të “Vizion Plus” formate që tashmë janë shndërruar në traditë, si
“Dita Ime” (maratona programore e paradites); “By Pass Show” i moderuar nga Agim Bajko (sjell sërish në vëmendjen e publikut ngjarje kryesore të javës të para nën një këndvështrim tjetër); “Chic Plus”; “Next”; Uefa Europa League etj. Nuk mungojnë në këtë sezon edhe serialet e telenovelat. Përveç atyre që janë në transmetim do të vijë për publikun një produksion i suksesshëm turk,
“Kardayi”, fitues i 18 çmimeve ndërkombëtare. Është historia e një njeriu që vendos të sakrifikojë, gjithçka madje edhe jetën, për të vendosur drejtësinë.
E në fakt duket sikur ka rënë disi “agresiviteti” i televizioneve shqiptare sa i përket prodhimtarisë. Sipas drejtuesve të programacionit në “Vizion Plus”, prodhimtarinë e dikton tregu e kur ky i fundit zhytet në krizë, kjo padyshim që do të reflektohet edhe te televizionet shqiptare. Megjithatë duket se mediat shqiptare kanë sakrifikuar dhe vazhdojnë të mbijetojnë, jo thjesht në funksion të një tregu konkurrent, por edhe të respektit ndaj një audience që i ndjek, vlerëson dhe komenton çdo ditë. “Ne si ‘Vizion Plus’ nuk është se kemi hequr dorë nga produksionet ‘in house’, përkundrazi në këtë sezon janë kuruar, riformatuar e rikonceptuar në çdo element të tyre, për të sjellë vëmendjen e publikut e njëkohësisht për të mundësuar një konkurrencë sa më efektive e produktive në një treg që ndryshon çdo ditë”, thonë drejtuesit e programacionit.
Ata thonë se bëhen përpjekje për të mbajtur në monitorim të vazhdueshëm raportin kosto/përfitim në funksion gjithnjë të logjikës së një biznesi të ndershëm.
Sa i përket konkurrencës, drejtuesit e “Vizion Plus” thonë se në kushtet e një tregu tashmë të konturuar, ajo është më e fortë dhe më e konsoliduar. “Në rast se më parë, në një treg të fragmentuar, me pak impenjim, arrije të konkurroje, pavarësisht madhësisë së segmentit që mbuloje dhe audienca lëvizte lirshëm nga një media tek tjetra, sot situata është krejt ndryshe. Segmentet e mbulimit në treg janë më të mëdhenj, por mbajtja dhe kurimi i tyre sistematik është një punë që kërkon impenjim maksimal duke ofruar gjithnjë cilësinë dhe sasinë e duhur të produktit në vendin dhe kohën e duhur. Kemi arritur t’ia dalim deri më sot dhe synojmë ta bëjmë këtë edhe në të ardhmen. Strategjia jonë është ajo e diferencimit, që përmes një studimi të plotë të tregut të arrijmë të përcaktojmë pikat e forta dhe të dobëta, të identifikojmë segmentet reale në treg dhe të synojmë një pozicionim sa më të mirë dhe efektiv, duke i shërbyer kështu rritjes dhe forcimit të markës”, thonë drejtuesit e programacionit të këtij televizioni.
Audienca, ngërçi që nuk largohet
E për të matur suksesin e çdo programi është fjala e audiencës, që në Shqipëri ende nuk thuhet në mënyrë shkencore.
“Mungesa e matjes është diçka që e vështirëson punën. Megjithatë ka disa përpjekje në tregun e marketingut për të ofruar shërbim në matjen e audiencës nga aktorë profesionistë, të pavarur. Nuk janë në një gamë të gjerë, por është vetëm fillimi”, thotë drejtuesja e programacionit në “Top Channel”. Sipas saj, është pozitiv fakti që këto matje kanë filluar. E deri në konsolidimin e këtij shërbimi menaxherët e programacioneve duhet t’i besojnë intuitës, por jo vetëm edhe asaj që sjellin tregjet perëndimore. “Ne duhet të përdorim të gjitha mjetet e tjera të nevojshme për të siguruar suksesin e atij programi. Pra, nëse blihet një format, duhet të shikohet sesa afër mentalitetit të vendit tënd është. Shikon se çfarë shitjesh apo audience ka pasur. Një tjetër element është të shikosh se çfarë programesh i mungojnë ekranit apo target-grupeve për të cilat televizioni interesohet që t’i tërheqë. Duhet të them se për ne nuk rreshtin kontaktet apo pyetjet për atë që mund të përmirësojmë, apo për të kuptuar se formati do të funksionojë ose jo. Rreziku është i pranishëm gjithmonë aty. Ka formate që kanë konsum, që bëjnë ciklin, prandaj i mençur është ai që di të tërhiqet në kohën e duhur dhe kupton që është koha për t’u tërhequr”, thotë znj. Dedei.
Ndërsa ekspertët thonë se në mungesë të një sistemi, të matjes së vazhdueshme e shkencore të audiencës, është pothuajse e pamundur të bëhet një planifikim dhe një shpërndarje e informuar e shpenzimeve publicitare. Mungesa e këtyre të dhënave e bën të pamundur përllogaritjen e ROI-t (kthimit të investimit) apo efektit të investimit marketing/publicitar për produktet dhe shërbimet e ndryshme që reklamohen në media.
Sipas ekspertëve, matja e audiencës do të ndihmonte në gjetjen e kanaleve më të mira, për përshtatshmërinë e një marke dhe për komunikimin e mesazheve të shumta e specifike. Rreziqet financiare janë shumë të larta, ndaj kompanitë dhe agjencitë kanë nevojë që të ndërmarrin veprime të menjëhershme për të shpenzuar sa më mirë çdo para të investuar në fushën e publicitetit. Për këtë arsye, thonë ata, matja sa më objektive dhe e pavarur e audiencës është domosdoshmëri emergjente.
Kompanitë dhe agjencitë e ndryshme kanë nevojë të monitorojnë efikasitetin e parave të shpenzuara për transmetimin e një mesazhi të caktuar për një markë të caktuar, bazuar në targetin përkatës dhe të ndërmarrin veprime për të përshtatur këto shpenzime në bazë të efektivitetit, që ato kanë dhe shikueshmërisë së audiencës së synuar. Kjo do të shmangte shpenzimet e panevojshme për mesazhe që nuk shkojnë atje ku duhet. Kjo mund të arrihet nëpërmjet identifikimit të menjëhershëm të mundësive, thonë ekspertët, por edhe duke monitoruar programet apo kanalet e tjera menjëherë, ditën e ardhshme. Me anë të monitorimit të shikueshmërisë së programeve, kanaleve, duke bërë të mundur matjen e konkurrencës reale ndërmjet programeve dhe kanaleve të ndryshme në të njëjtin orar, në fasha orare të ndryshme, në grupmosha, etj. Si pasojë e mungesës së matjes së audiencës, përcaktimi i çmimeve për blerjen e hapësirave publicitare (kohës televizive), bëhet bazuar vetëm në hamendësime, në planifikimin e target-audiencës së bërë nga televizionet apo duke iu referuar përvojave dhe të dhënave të emisioneve të ngjashme në vende të tjera. Gjithsesi, matja e vazhdueshme e audiencës (ose monedha e përbashkët e shkëmbimit të kohës televizive) mbetet ende çështje e pazgjidhur e tregut të televizioneve në Shqipëri, e cila do të shërbente si një rregullator mjaft i mirë vetërregullues për transaksionet në këtë treg.
Ekspertët nuk sugjerojnë domosdoshmërisht uljen e numrit të transmetimeve për njësi apo kohës së përgjithshme të transmetimit të fushatave të tyre, por hartimin e një plani të studiuar mirë që duhet të bazohet fillimisht në nivelin e performancës mediatike të synuar dhe më tej, në analizat financiare. Të dhënat e brendshme të agjencive tregojnë se televizioni mbetet ende në masë dërrmuese, kanali kryesor për të përçuar mesazhet publicitare në tregun shqiptar.