Ajo kërkon të fitojë të ardhura nga videot, duke zbatuar teknikat e tregtisë elektronike, shkruan The Economist
Ndërsa një breshëri plumbash fluturojnë drejt një treni, i cili po udhëton me shpejtësi nëpër Alpet Italiane, duke mbajtur në bord një grua që ka qenë Miss Bota dhe një grup spiunësh, gjëja e fundit që do t’u shkonte ndër mend shikuesve që po e shohin këtë film në ekran, është blerja online.
E megjithatë, nëse e ndërpresin filmin, do të shohin të afishuar një program që u jep mundësinë të blejnë artikujt e shfaqur në film, si, gjerdanin e artë të heroinës, fustanin e saj të kuq ose takat e larta që nuk e pengojnë t’ia mbathë nga keqbërësit.
Vetëm parfumi i saj i fortë nuk është ende në shitje.
“Citadel” është një shfaqje televizive thriller në Amazon Prime Video. Ajo është një shembull që tregon se çfarë ndodh kur shitësi më i madh online në botë bëhet një nga prodhuesit më të mëdhenj kinematografikë.
Përveç mundësisë për të blerë artikujt e shfaqur në film në faqen e tregtisë elektronike të Amazon, publiku mund të dëgjojë edhe kolonën e tij zanore në Amazon Music, ose të lexojë mbi prodhimin e filmit në faqen online, imdb.com, që është e lidhur me Amazon.
Kasti shumëkombësh dhe komploti, si dhe versionet spin-off të planifikuara në një sërë gjuhësh janë zgjedhur me kujdes për të tërhequr blerës në botë.
Përbuzja nga Hollivudi
Emrat e vjetër të Hollivudit i shohin me përbuzje përpjekjet e Amazon në fushën e kinematografisë dhe kjo është e kuptueshme.
Pavarësisht një buxheti të raportuar prej 300 milionë dollarësh, duke e bërë atë serinë e dytë më të shtrenjtë televizive në histori (pas “The Rings of Power”, një tjetër projekt i Amazon), seriali “Citadel” mori vlerësime të vakëta dhe nuk arriti të hynte në renditjen e dhjetë shfaqjeve televizive më të ndjekura në Amerikë (megjithëse Amazon thotë se ka pasur rezultate më të mira në pjesën tjetër të botës).
Kritikët e shohin këtë ecuri si shembullin tipik të një kompanie me shpenzime të larta dhe ndikim të ulët në fushën e kinematografisë. Këtë vit, Amazon do të shpërndajë 12 miliardë dollarë në transmetime, në vend të dytë vetëm pas Netflix (shih grafikun).
Ka pasur disa seriale që janë bërë të famshme, duke përfshirë “Reacher” dhe “The Boys”. Por 45 nominimet për çmimet Emmy (një rekord për Amazon), janë më pak se gjysma e nominimeve që kanë marrë shërbime të tjera si Netflix ose Warner-Discovery.
“Shënjestra e Amazon nuk është e mirë dhe nuk përputhet me shpenzimet e saj”, pranon një ish-punonjës.
Megjithatë, pavarësisht gabimeve krijuese, Amazon po përgatit në heshtje diçka që i ka shpëtuar shumicës së rivalëve: një model për mënyrën se si mund të fitojë të ardhura nga transmetimi duke ndihmuar njëkohësisht bizneset e saj të tjera.
Shfaqjet televizive të prodhuara nga Amazon mund të mos jenë shumë popullore, por kompania po përgatitet t’i nxisë ato nëpërmjet makinës së saj të frikshme reklamuese dhe po e kthen aplikacionin e transmetimit në një treg me shitje të lartë, nëpërmjet faqes së saj të tregtisë elektronike.
Hollywood mund të tallet me cilësinë e prodhimit të Amazon, por qesh mirë kush qesh i fundit dhe kjo mund të jetë Amazon.
Të ardhurat nga transmetimi
Amazon është përfshirë në biznesin e videove që nga viti 2006, kur prezantoi Unbox, një platformë shkarkimi të ngjashme me iTunes. Që atëherë, kompania ka investuar për t’u bërë një nga forcat më të mëdha kinematografike.
Shërbimi i saj kryesor i transmetimit, Prime Video (8,99 dollarë në muaj, ose falas si pjesë e anëtarësimit më të gjerë në Amazon Prime), tërheq rreth 156 milionë shikues në muaj në mbarë botën, afërsisht sa Disney+, dhe në vend të dytë vetëm pas Netflix. Freevee, shërbimi i transmetimit falas me reklama, ka rreth 40 milionë shikues.
Twitch, një faqe për transmetim të drejtpërdrejtë që Amazon e bleu në vitin 2014, tërheq rreth 35 milionë vizitorë në ditë, kryesisht për videolojëra.
Fire TV, sistemi mediatik i lidhur me Amazon, përdoret nga pothuajse 100 milionë pajisje në gjithë botën, sipas TechInsights, një shoqërie të dhënash. Janë bërë ulje të mëdha për të joshur njerëzit në ekosistemin Fire: në fillim të këtij viti, Amazon ofroi një televizor Fire 43 inç, për 99 dollarë.
Motivi më i dukshëm për eksperimentet e Amazon me krijimin e filmave, është rritja e vlerës së paketës Prime, e cila i shtyn klientët të blejnë në faqen e saj të tregtisë elektronike.
Por kinematografia gjithashtu ka potencialin për t’u bërë një burim të ardhurash më vete, në dy mënyra.
Së pari, nëpërmjet reklamimit. Në pak më shumë se një dekadë, Amazon ka krijuar një biznes me reklama dixhitale që ka prishur dypolaritetin e vjetër Google dhe Meta.
Të ardhurat e saj nga reklamat këtë vit do të jenë rreth 45 miliardë dollarë, duke përbërë rreth 7.5% të reklamave dixhitale në mbarë botën, vlerëson shoqëria kërkimore Insider Intelligence.
Biznesi ka arritur në më shumë se një të tretën e madhësisë së biznesit të reklamave të kompanisë Meta dhe po vazhdon të rritet me shpejtësi.
Por ndërsa Google dhe Meta kanë operacione të shëndetshme reklamimi në fushën e videove (nëpërmjet YouTube dhe Reels), inventari i Amazon përbëhet kryesisht nga rezultatet e kërkimit të sponsorizuara në faqen e saj të tregtisë elektronike.
Kjo duket se po ndryshon. Amazon e ka mbajtur platformën Prime Video kryesisht pa reklama për të ruajtur një ndjesi “premium”, thotë një drejtues i lartë. Por pasi Netflix dhe Disney+ shfaqën reklama vitin e kaluar, edhe të tjerët morën dritën jeshile për të bërë të njëjtën gjë.
Amazon ka eksperimentuar me shfaqjen e reklamave në shfaqjet sportive të Prime dhe ka zhvendosur më shumë katalogë në platformën Freevee, transmetuesin e saj të mbështetur nga reklamat. Analistët presin që së shpejti, të ketë më shume ndërprerje publicitare në Prime
Midis transmetuesve, Amazon është në një pozicion më të veçantë në lojën e reklamave.
Ndërsa Netflix pranon se është i kufizuar kryesisht në reklamat e përgjithshme të “markave”, Amazon ka informacion të mjaftueshëm për klientët e saj, nëpërmjet faqes së tregtisë elektronike dhe dyqaneve ushqimore Fresh, dhe kështu mund t’i shënjestrojë klientët me reklama shumë të personalizuara.
Për më tepër, ajo edhe mund të masë efektivitetin e këtyre reklamave, duke vëzhguar sjelljen e mëvonshme të klientëve në dyqanet e saj.
Kompania ende nuk e ka shfrytëzuar plotësisht këtë aftësi, por shikuesit do ta provojnë atë në fund të këtij muaji, kur Amazon pritet të shfaqë reklama të posaçme sipas shijes së klientëve, në programin “Futbolli i së enjtes mbrëma”.
Në nëntor, do të shfaqë një sërë reklamash kur të transmetojë ndeshjen e parë të futbollit amerikan që përkon me të Premten e Zezë (Black Friday), e cila është një ngjarje vjetore blerjesh.
Prandaj ky do të jetë një “vit i rëndësishëm” për biznesin e reklamave të Amazon, thotë Andrew Lipsman nga shoqëria Insider Intelligence. “Do të përcaktohet e ardhmja e strategjisë së kompanisë në fushën e transmetimit të videove”, parashikon ai.
Banka Morgan Stanley parashikon se brenda dy viteve, biznesi i sapolindur i reklamave video të Amazon do të vlejë më shumë se 5 miliardë dollarë në vit vetëm në Amerikë dhe se në një periudhë afatgjatë, dijet e saj të gjera mbi shikuesit, mund ta lejojnë të vendosë tarifa më të larta për reklamat se çdo platformë tjetër videosh.
Një aftësi e tillë do të bëhet më e vlefshme në transmetim. Reklamat në televizionet e lidhura me internetin përbëjnë rreth një të tretën e shpenzimeve të reklamave televizive në Amerikë.
Ndërsa kjo përqindje rritet, një “thes me flori” i pret shitësit e reklamave dixhitale, thotë një ish-ekzekutiv i kompanisë Amazon.
Për më tepër, thekson zoti Lipsman, “Të dhënat kur paraqiten, shndërrojnë tregjet”. Reklamat televizive janë ndër më efektivet, por ndikimi i tyre është i vështirë të matet.
Ndërsa reklamuesit fitojnë aftësinë për të parë se si klientët reagojnë ndaj reklamave të tyre, tregu i reklamave televizive, i cili tani vlen rreth 90 miliardë dollarë në vit në Amerikë, do të rritet, dhe pjesa më e madhe e biznesit të ri, do të shkojë për kompanitë që ofrojnë matjet më të mira.
I pari në fushën e televizionit
Qasja e dytë e Amazon për të fituar të ardhura të mëdha nga videot, është t’u shesë shikuesve jo vetëm produktin e vet, por edhe përmbajtjen e kompanive të tjera.
Ndërsa shikuesit që hapin aplikacionin Netflix ose Disney+ shohin shfaqje vetëm në ato platforma, ata që hapin Amazon Prime Video mund të kenë qasje në përmbajtje nga një sërë transmetuesish të tjerë.
Nëse një klient lidhet me një nga ato shërbime të tjera nëpërmjet Prime, ose blen një shfaqje televizive, Amazon merr një përqindje, që shkon nga 20% deri në 50%.
Dhe kur një klient shikon një kanal falas nëpërmjet Prime, Amazon merr një pjesë të të ardhurave nga reklamat ose shet reklamat e veta në këtë kanal.
Tom Harrington nga shoqëria kërkimore Enders Analysis, e krahason këtë qasje me strategjinë e provuar të Amazon në shitjen me pakicë. Kompania nisi të shiste produktet e veta, përpara se të hapte tregun edhe për tregtarët e tjerë.
Tani, dy të tretat e shitjeve në Amazon.com bëhen nga palë të treta dhe Amazon merr një komision. Nga ky biznes ka fitime shumë më të larta se nga shitja e mallrave të veta. Qëllimi i kompanisë është të bëjë të njëjtën gjë në fushën e videove, beson zoti Harrington.
Kjo analizë hedh dritë mbi qëllimin e serialeve me buxhet të lartë si “Citadel”. Amazon vazhdon të rezervojë faqen e tregtisë elektronike me produkte të palës së parë, për të ruajtur konkurrencën e çmimeve dhe për të siguruar që tregu të ketë një ofertë mjaft të gjerë për të nxitur klientët të kthehen.
Përmbajtja e Prime Video luan rol të ngjashëm: ajo ofron shfaqje të profilit të lartë dhe sporte të drejtpërdrejta (diçka që nuk ofrohet nga shumica e transmetuesve të tjerë), që i shtyjnë njerëzit të hapin aplikacionin, duke u garantuar atyre një gamë të gjerë përmbajtjesh nga ku mund të zgjedhin.
“Pyetja e vërtetë nuk është sa njerëz e panë ‘Rings of Power’, – thotë zoti Harrington, – por sa njerëz hynë në Prime për shkak të ‘Rings of Power’…dhe më pas shpenzuan më shumë për përmbajtje të tjera”.
Amazon duket se po arrin qëllimin që njerëzit të kalojnë më shumë kohë në platformën e saj. Edhe pse pak nga serialet apo shfaqjet e saj hyjnë në dhjetëshen më të ndjekur, shifrat nga Nielsen tregojnë se pjesa e transmetimit të platformës Prime Video në Amerikë është rreth 70% më e madhe se ajo e Disney+ dhe më shumë se dyfishi i kompanisë Maks.
Nuk është e lehtë të bëhesh pronar i përmbajtjes kinematografike. Fuqia negociuese e Amazon mbi furnizuesit është më e dobët në fushën kinematografike, sepse në këtë fushë, ka pak studio të mëdha me oferta të drejtpërdrejta për konsumatorët, ndërsa në tregtinë elektronike ka miliona shitës të vegjël që përdorin tregun e saj.
Edhe ruajtja e klientëve është më e vështirë për Amazon në këtë fushë: megjithëse kompania përbën gati 40% të shitjeve të tregtisë elektronike në Amerikë, platforma e saj televizive Fire është përgjegjëse për vetëm rreth 15% të trafikut të transmetimit atje.
Sidoqoftë, kompania është duke gjetur mënyra për të fituar para në një industri që po mbytet në humbje.
Amazon mund të mos fitojë shumë çmime Emmy, ose mund të mos hyjë në dhjetëshen më të mirë të serialeve, por, thotë një ish-drejtues ekzekutiv, qëllimet kryesore të saj në këtë fushë janë që njerëzit të shikojnë televizor nëpërmjet pajisjeve të saj, të blejnë përmbajtje përmes dyqanit të saj dhe të shikojnë reklama të shfaqura nga Amazon.
Edhe nëse seriali “Citadel” është një dështim, ai mund ta ketë kryer punën e vet.
Përktheu: Lira Muça