Sa rritemi – kjo qenka dilemar!
 
Prej disa ditesh po ndjekim nje debat midis institucioneve te ndryshme per rritjen e ekonomise shqiptare. Debati interpretohet dhe komentohet ne media sipas preferences politike te tyre. Debati po behet midis Fondit Monetar Nderkombetar – Bankes Boterore – Opozites – Pozites –  Analisteve – Institutit te Statistikave – …. dhe zbriti deri brenda qeverise. Me konkretisht media shpalli si debat te ashper diskutimin midis kryeministrit dhe ministrit te financave per normen e rritjes ekonomike. Eshte 9.9% apo 6%, apo 3-4% qe e tha FMN sapo plasi kriza financiare ne boten e zhvilluar.
Askush ne fakt nuk na thote listen e argumenteve qe mbeshtesin normen e shpallur te rritjes ekonomike. Ne prononcimin me te fundit te perfaqesueses se FMN-se ne Tirane, argumenti me kryesor eshte qe per shkak te krizes mbareboterore FMN po mban te ulura parashikimet per rritjen ekonomike.
Pra, cili eshte vleresimi me i perafert i rritjes ekonomiker Ta dini nuk ka shume rendesi. Mund te themi edhe 12% mund te rritet ekonomia shqiptare dhe prape te mos bejme gafe profesionale. Sa kohe qe ekonomia joformale ne vend ka nje peshe mjaft te konsiderueshme çdo vleresim apo matje qe i behet rritjes ekonomike shqiptare eshte nje tregues qe po t’i qepesh i gjen sa te duash mangesi dhe argumente kundershtimi.
Por askush, as institucioni prestigjoz i financave nderkombetare, FMN nuk e shtruan kurre per debatim dhe diskutim se cila eshte rritja ekonomike potenciale e Shqiperise dhe sa larg ketij potenciali jane rritjet e matura e te vleresuara ne keto vite. Ajo qe ka rendesi te diskutohej eshte perse ekonomia shqiptare, megjithe rritjet ekonomike pozitive dhe me te lartat ne rajon, eshte perseri me deficite te larta tregtare dhe te llogarise korrente, me nivel te ulet investimesh te huaja, me nivel te larte te papunesise, me nivel te ulet teknologjik dhe te infrastruktures komunikuese, sidomos te penetrimit te kompjuterave dhe perdorimit te internetit. Perse pas gjithe ketyre vitesh programe stabilizimi me FMN, perseri ekonomia shqiptare ka te njejtin model rreziqesh, bazohet ne ekzaktesisht te njejtat burime financimi (dergesat e emigranteve, te cilat meqe ra fjala edhe ato nuk po dihet se sa jane saktesisht) si dhe nuk ka krijuar burime alternative qe te mundesojne qendrueshmerine e rritjes afatgjate.
Jane te gjithe keta elemente qe duhet ne fakt te terheqin debatin dhe jo thjesht se sa rritet ekonomia shqiptare. Ka shume mundesi qe ne vitin 2008 ekonomia shqiptare te rritet me ritem te larte, ndoshta dhe me shume se 6% per shume arsye. Por problemi baze ai i shtrirjes se rritjes ekonomike ne te gjitha shtresat e popullsise dhe rajonet e vendit nuk po gjen diskutim. Askush nuk po guxon te thote: Sa duhet ta kemi rritjen ekonomike, qe aspiraten tone per t’u integruar edhe ekonomikisht me Bashkimin Europian te mos e realizojme pas 100 vjetesh. Duhet ta besoni! Per te shkurtuar shekullin qe na duhet per t’u integruar ekonomikisht ne BE, Shqiperise i duhet nje rritje ekonomike shume me e larte.