Këshilli Bashkiak i Tiranës i ka hapur rrugë nisjes së ndërtimit të bulevardit të ri të Tiranës. Me një grant prej 7 milionë eurosh, akorduar nga shteti i Katarit, brenda muajit prill do të nisë puna për zgjatimin e bulevardit, në vendin ku sot është Stacioni i Trenit. Ky vendim u abstenua nga këshilltarët e PS dhe mori miratimin e të gjithë anëtarëve të tjerë të Këshillit Bashkiak të Tiranës. Kreu i Bashkisë së Tiranës Lulzim Basha e ka cilësuar nisjen e punës për bulevardin e ri, pjesë të përpjekjes për Tiranën moderne evropiane, për zhvillimin ekonomik dhe rritjen e punësimit në kryeqytet.
“Me këtë vendim, Këshilli Bashkiak shënon fundin e fazës përgatitore të këtij projekti dhe fillimin e fazës së investimit të bulevardit të ri të Tiranës, pjesë e projektit të bulevardit dhe lumit të Tiranës. Në sipërfaqen e tij urbane “ngërthen” pothuajse ¼ e qytetit të Tiranës. Vjen pas miratimit nga ky Këshill të planit urban dhe është pjesë e përpjekjes sonë për t’i dhënë Tiranës një plan modern, evropian zhvillimi por po kështu një plan të zbatueshëm siç tregon në rastin e këtij investimi publik edhe hapi tjetër që do të hedhim, ky i investimit të bulevardit të ri të Tiranës. Nga pikëpamja e vlerës së shtuar për kryeqytetin, do të ndalesha tek dy momente; i pari afatshkurtër që ka të bëjë me zotimin tonë për të bërë punësimin dhe zhvillimin ekonomik, çështje kryesore të axhendës së kësaj Bashkie dhe në këtë pikë, pa dyshim fillimi i një investimi kaq madhor është një lajm i mirë jo thjesht për industrinë e ndërtimit, kompanitë të cilat do të përfshihen drejtpërdrejt në ndërtimin e bulevardit por për të gjithë zinxhirin ekonomik që tërheq me vete, për zhvillimin në dy anët e këtij aksi, për vëmendjen e veçantë që ka ngjallur tek investitorët e huaj, duke filluar me vetë donatorët, ata të Katarit të cilët po përgatisin një mision të dytë për të finalizuar investime në fushën e hotelerisë dhe qendrave komerciale në aksin e bulevardit. Natyrisht, nuk janë të vetmit, pasi ka edhe shumë të tillë. Pra, hap një kapitull të ri në “zemrekun” ekonomik të Shqipërisë dhe mu në zemër të këtij “zemreku”, që është aksi veri-jug i qytetit të Tiranës” – u shpreh z.Basha.
Kryebashkiaku Basha ka bërë të ditur se përveç shtetit të Katarit, ky projekt ka marrë mbështetje të gjerë edhe nga donatorë të tjerë. Puna, sipas zotit Basha, do të nisë me zhvendosjen e linjave të tensionit të lartë dhe Hekurudhës.
“Hapi i parë do të hidhet dy apo tre javët e ardhshme, zhvendosja e linjave të tensionit, zhvendosja e Hekurudhës dhe pastaj përmes këtij granti, ne do të nisim menjëherë nga puna për ndërtimin e komponentëve të parë të bulevardit të ri të Tiranës.
Faza e parë prej 7 milionë eurosh parashikon pjesën e parë të bulevardit, nga fillimi i Stacionit të Trenit deri në afro 600-700 metra thellësi, duke përfshirë këtu një vepër madhore të bulevardit që është një parkim i madh nëntokësor, publik në pjesën ku sot ndodhet Stacioni i Trenit, ndërkohë që me fonde të tjera të donatorëve, me një kredi me terma të butë që është negociuar dhe është në proces përfundimi me një tjetër partner të rëndësishëm tonin, Fondi i Zhvillimit të Abu Dhabit (ka kontribuar edhe gjysmën e parave për tunelin e Kërrabës) do të plotësohen edhe komponentët e tjerë financiarë që përfshijnë pjesën tjetër të bulevardit dhe rehabilitimin e shtratit të lumit të Tiranës, ndërtimin e infrastrukturës shoqëruese” – u shpreh kreu i Bashkisë.
Një tjetër vendim i miratuar në mbledhjen e Këshillit Bashkiak ishte dhe përcaktimi i kritereve dhe proçedurave për përzgjedhjen e bankës së nivelit të dytë për të mundësuar një kredidhënie të lehtë, të shpejtë, me interesa të ulëta, pa burokraci të tepërta dhe transparencë për të gjithë përfituesit e fondit te garancive. Ky projekt është në vazhdën e nismave të Bashkisë së Tiranës, për të nxitur zhvillimin e biznesit dhe rritur punësimin.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.