Prej disa ditësh në pikat e furnizimit me karburant të ofrohet një naftë vendi(Ballshi) me çmim rreth 10 lekë më të lirë se nafta e importit e klasifikuar D2. Me shënimin “e re” disa nga pikat e karburantit ta ofrojnë naftën në çmimin 171 lekë duke të sqaruar se është naftë vendi ndërkohë që çmimi i naftës së importit është rreth 188-190 lekë.
Deri javën e kaluar në të gjitha pikat e tregtimit të karburanteve kishte vetëm një cilësi dhe një çmim për naftën diesel të klasifikuar si D1 me përmbajtje squfuqi më pak se 10 ppm. Për naftën e tregtuar me çmim të diferencuar nuk shkruhet nëse është D1 apo D2 por thjesht që është prodhim vendi dhe kuptohet me më shumë sasi squfuri se nafta e importit.
Me një vendim të qeverisë pikërisht VKM Nr 52, 11 14.01.2009, nafta D2 për periudhën janar – gusht 2009, mund të prodhohej dhe tregtohej në këtë nivel vetëm nga ana e rafinerisë “ARMO” SHA.
Sipas vendimit nga muaji shtator 2009 në Shqipëri nuk duhet të tregtohej më nafta e kategorisë D2 dhe për këtë arsye mbetet detyrë e organeve fiskale dhe Inspektoriatit Qëndror Teknik verifikimi nëse nafta e tregtuar me çmim të diferencuar plotëson kriteret ligjore dhe nënligjore për përmbajtjen e squfurit.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.