PFlet Adrian Bunguri, CEO i Trium Communications
Sporti ka veçorinë që të kapërcejë të gjitha pengesat kulturore, gjeografike apo demografike dhe t’i bashkojë të gjithë ndjekësit në një angazhim emocional, me ndjesi dhe emocione të larta. Adrian Bunguri, CEO i “Trium Communications”, pohon se prania e markave të ndryshme gjatë përjetimit të këtyre emocioneve në nënndërgjegjen e ndjekësve krijon një lidhje emocionale shumë të fortë.
Ai shton se interesi për të alokuar buxhete marketingu në evenimente sportive është shtuar ndjeshëm, pas arritjeve të mira në sporte.
Cila ka qenë ecuria e tregut të reklamave në periudhën e fundit, nëse ka ndryshime në kanalet e komunikimit dhe nëse këto ndryshime janë reflektuar në rialokime buxhetesh?
Mund të themi se në strukturën e përgjithshme të tregut nuk ka shumë ndryshime thelbësore. Kanalet e komunikimit janë po ato, me luhatjet e veta që ndjekin trendin botëror. Televizioni mbetet me shumë dallim kanali më i ndjekur dhe më me ndikim dhe ka një diferencë të madhe me kanalet e tjera të komunikimit, edhe më të madhe se në tregjet e tjera të zhvilluara.
Kjo vjen përgjithësisht për shkak se tregu ynë është më i vogël dhe kompakt dhe ndikimi i buxheteve të markave ndërkombëtare është ende shumë i lartë. Kanalet dixhitale vazhdojnë rritjen, e cila vjen përgjithësisht për shkak të përdorimit shumë të gjerë të tyre edhe nga aktorë, të cilët nuk kanë buxhetet e mjaftueshme për të përdorur kanalet e tjera më prestigjioze si televizioni.
Radio mbetet një kanal i mirë komunikimi, sidomos në fasha të caktuara të ditës, por pa luhatje shumë të mëdha. Investimet serioze në disa prej këtyre kanaleve të radios kanë sjellë rritje të buxheteve në këto radio, por këto rritje nuk e ndryshojnë thelbësisht ndarjen e tortës.
Sfidë mbetet matja e audiencës, një plagë e madhe e sektorit, e cila jo vetëm deformon pjesën e buxhetit që marrin TV, por edhe nuk e lë atë të rritet në nivelet që meriton.
Si e shihni interesin për investime buxhetesh marketingu në evente sportive? (A ka një trend në rritje…?)
Sporti ka qenë dhe mbetet një nga sektorët më me interes për audiencat. Pavarësisht paragjykimit që sporti ka përgjithësisht një audiencë mashkullore, mund të themi se ky paragjykim sa vjen edhe po zbehet.
Ndikimin e sportit mund ta analizojmë në dy drejtime: në reklamimin gjatë eventeve sportive në mjediset sportive apo në media, si dhe në sponsorizimin e ekipeve apo sportistëve të ndryshëm nga markat në vend. Vërehet qartë një rritje e buxheteve në të dy drejtimet, dhe kjo gjë vjen edhe për shkak të arritjeve të ndryshme të sportistëve tanë në rang ndërkombëtar si në atletikë, futboll, boks etj.
Arritjet e mira të tyre përkthehen në interes dhe audiencë të lartë, të cilat përkthehen në buxhete reklamimi të larta. Shembuj shumë të mirë të kësaj të fundit janë sponsorizimet nga disa kompani të Ekipit Kombëtar të Futbollit, të atletes Luiza Gega, të boksierit Florian Marku dhe shumë sportistëve të tjerë.
Çfarë i motivon subjektet tregtare që të alokojnë buxhete reklamimi në evente sportive, kryesisht futbollin?
Pa diskutim, rritja e shitjeve të produkteve apo shërbimeve të tyre. Dhe ky objektiv arrihet më së miri, duke reklamuar në ato aktivitete ku jo vetëm audienca është e lartë, por edhe asocimi që audienca mund të krijojë me markat është gjithashtu e lartë.
Sporti ka veçorinë që të kapërcejë të gjitha pengesat kulturore, gjeografike apo demografike dhe t’i bashkojë të gjithë ndjekësit në një angazhim emocional me ndjesi dhe emocione të shumta.
Dhe prania e markave të ndryshme gjatë përjetimit të këtyre emocioneve në nënndërgjegjen e ndjekësve krijon një lidhje emocionale shumë të fortë.
Prej vitesh, shkenca e neuromarketingut po përpiqet të analizojë reagimet e njerëzve ndaj markave të caktuara dhe deri më sot rezulton që ndërveprimi më i lartë me markat ndodh kur kontakti i tyre ka qenë në momentet e tyre më emocionale.
Si e sa e parashikoni ngarkesën ju si agjenci në kuadër të një eventi si UEFA Euro 2024? (shërbime agjencie për shportën tuaj, fushata komunikimi, përgatitje materialesh kreative, media buying, etj.)
UEFA Euro 2024 është pa diskutim kompeticioni sportiv më i ndjekur dhe i mirëpritur këtë vit. Duke marrë në konsideratë që ky aktivitet sportiv ka një audiencë pothuajse të ngjashme me Kupën e Botës, me mbi 5 miliardë shikime gjatë gjithë muajit, ne si agjenci fillojmë planifikimin me klientët tanë që në muajin shkurt, për të alokuar buxhetet e caktuara dhe për të planifikuar aktivitetet e duhura.
Duke marrë në konsideratë edhe faktin që Kombëtarja jonë këtë vit merr pjesë në këtë Kupë për herë të dytë, interesi i markave rritet shumëfish. Duke marrë për bazë edhe pjesëmarrjen tonë të parë, pritet që këtë vit, kjo Kupë e Europës të kthehet në një festival të vërtetë.
Për këtë arsye, edhe puna jonë nuk mbetet vetëm në planifikimin e hapësirave reklamuese në media, por, për të krijuar sinergjinë e duhur me të gjitha kanalet e mundshme të komunikimit, planifikohet kalendari i të gjithë aktiviteteve.
Materialet krijuese duhet të jenë të rëndësishme, rrjetet sociale duhet të jenë planifikuar deri në detajin më të vogël, duhen organizuar lojëra promocionale, qoftë në ambientet ku ndeshjet ndiqen jashtë shtëpisë, qoftë në rrjete sociale, pra me pak fjalë duhet përdorur një strategji shumëkanalëshe.
Ky koordinim i këtyre aktiviteteve, në fund do të rezultojë në krijimin e sinergjisë së duhur, për të përfituar maksimumin nga kjo audiencë kaq e lartë që do të ndjekë këtë aktivitet me emocion po aq të lartë.
Klientët tanë prej vitesh kanë marrë pjesë në Kupat e Botës dhe të Europës dhe tashmë e dinë edhe ndikimin shumë të madh të reklamimit aty. Këtë vit besojmë që interesi do të jetë shumë më i lartë.
LEXONI EDHE:
Të gjithë sytë tek Europiani, pritet audiencë rekord
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.