Vit pas viti përballjet ligjore të shtetit shqiptar me palë të treta në gjykatat ndërkombëtare po shtohen, duke u bërë shkak për një faturë serioze që vënë në rrezik financat publike të vendit.
Sipas të dhënave të Avokaturës së Shtetit, gjatë vitit 2016, vlera e çështjeve të humbura të shtetit shqiptar në arbitrazh i kalon 8 miliardë lekët (59 milionë euro). Kjo vlerë është e barabartë me 1.8% të të ardhurave buxhetore për këtë vit. Krahas kësaj vlere, arka e shtetit vitin që shkoi akumuloi më shumë se 30 milionë euro fatura ndaj vendimeve që kanë dhënë gjykatat vendase për shkarkimet e padrejta në administratë.
Por teksa shteti shqiptar do të duhet të shlyejë faturën 8 miliardë lekë nga vendimet e drejtësisë ndërkombëtare, ka arritur të shmangë rreth 112 miliardë lekë (817 mln euro) fatura, pasi çështjet e fituara nga Avokatura e Shtetit më 2016 kishin këto vlera.
Fatura buxhetore e arbitrazhit rrezikon të rritet gjatë këtij, pasi po shqyrtohen ankimet e ish-pronarëve, të cilët nuk kanë pranuar kompensimin e sipas ligjit të ri.
Qeveria shqiptare rrezikon të paguajë një faturë të kripur për kompensimin e 82 dosjeve për kompensim prone në Gjykatën Strasburgut. Shoqata Pronësi me Drejtësi pohoi se Gjykata e të Drejtave të Njeriut nuk ka pranuar kërkesën e qeverisë shqiptare për të kompensuar dosjet në proces, në bazë të zërit kadastral 1944, ku toka truall kompensohet si tokë bujqësore.
Gjykata ka kthyer kërkesën e qeverisë shqiptare për të paktën pesë dosje dhe nuk ka pranuar versionin e saj për kompensimin, duke sjellë shumë pranë një kolaps fiskal. Vlera e 82 dosjeve që po trajtohen është mbi 550 milionë euro, një faturë kjo e papërballueshme për arkën e shtetit.
Rasti Rista (çështja nr. 24468/10) është ilustrimi i asaj që pritet të ndodhë me kompensimin e ish-pronarëve. Duke pasur parasysh faktin se në kohën e konfiskimit, ngastra e tokës kishte qenë bujqësore, qeveria propozoi që çmimi i referencës për tokën bujqësore dhe në bazë të hartave të vlerësimit të vitit 2014 që duhet të zbatohet, vlera e tokës është 230 lekë për metër katrorë.
Vlerësimi i Gjykatës për sa i përket aplikimit nr. 24468/10 dhe 39495/10, vëren se autoritetet kishin njohur të drejtën e ankuesve për kompensim në lidhje me tokën ndërtimore dhe jo të tokës bujqësore apo kullota si të kontestuara nga qeveria.
Vendimi i njëjtë është marrë edhe për tre dosjet e tjera, si rasti Karagjozi kundër Shqipërisë, Halimi kundër Shqipërisë etj.
Ish-pronarët, nisur nga këto raste, komentojnë se nëse një gjykatë ndërkombëtare konstaton se Republika e Shqipërisë ka shkelur detyrimin që rrjedh nga një marrëveshje ndërkombëtare dhe, si rrjedhojë, janë cenuar të drejtat dhe liritë themelore të një personi fizik ose juridik, nëpërmjet një ligji ose akti normativ, Gjykata Kushtetuese, me kërkesë, mund të shfuqizojë ligjin ose aktin normativ, nëse konstaton se nuk ka mjet tjetër efektiv për të vënë në vend të drejtat e cenuara.
Teksa qeveritë shqiptare kanë dështuar në kthimin e kompensimin e pronës, ish-pronarët panë si zgjidhje Gjykatën Europiane për të Drejtat e Njeriut në Strasburg dhe buxheti i shtetit është para një rreziku serioz.
Sipas Avokaturës së Shtetit, 106 çështje që janë në pritje të shpalljes së vendimit, që i përkasin periudhës pas vitit 2014, kanë një vlerë prej 556.524.809 euro, shumë kjo sa rreth 20% e të ardhurave të pritshme të buxhetit vjetor të shtetit.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.