Gjatë dy javëve të para të muajit shtator numri i udhëtarëve që zgjodhën Portin e Durrësit ra ndjeshëm. Sipas të dhënave të Autoritetit Portual mbi 50 mijë udhëtarë shfrytëzuan tragetet e linjave nga Durrësi drejt porteve të Barit, Ankonës dhe Triestes (Itali) dhe anasjelltas. Pjesa më e madhe e udhëtarëve, afro 40 mijë, kryesisht shqiptarë që kaluan pushimet verore pranë familjeve janë nisur me tragete nga Durrësi drejt vendeve ku jetojnë dhe punojnë.
Gjatë periudhës 1-14 shtator të këtij viti tragetet kanë transportuar në largim nga Durrësi edhe 7117 autovetura dhe 1141 kamjonë dhe trajlerë. Ndërkaq tragetet janë shfrytëzuar nga 10.430 udhëtarë tw tjerw, që mbërritën në Durrës me 2130 autovetura, si dhe nga 1197 kamjonë dhe trajlerë.
Fluksi i mjeteve dhe udhëtarëve është përballuar nga 49 tragete në nisje dhe mbërritje. Gjatë muajit gusht, që përkon me pushimet verore, mbi 246 mijë udhëtarë shqiptarë dhe të huaj kanë shfrytëzuar tragetet e linjave nga Durrësi dhe anasjelltas.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.