Indeksi i çmimeve të konsumit, gusht 2012
Krahasuar me një vit më parë, norma e inflacionit mbetet gjithsesi më e ulët. Në gusht të vitit 2011, indeksi i çmimeve të konsumit ishte 3.1%.
Trendi rritës i IÇK-së (në terma vjetorë) vlerësohet të jetë ndikuar nga rritja e çmimeve të disa produkteve ushqimore. Indeksi i çmimeve për grupin “Ushqime, pije e duhan” u rrit ndjeshëm dy muajt e fundit duke arritur në 4.2% gjatë muajit gusht. Norma e rritjes së këtyre çmimeve ishte pothuajse sa ajo e një viti më parë. Sipas INSTAT, në gusht 2011 çmimet e këtij grupi pësuan një rritje vjetore prej 4.3%.Krahasuar me një muaj më parë, indeksi u rrit lehtësisht, vetëm 0.1%.
Sipas INSTAT-it, rritjen më të madhe të çmimeve e pësuan frutat dhe produktet e bulmetit.
Gjatë muajit të fundit të vlerësuar nga INSTAT, indeksi i çmimeve të grupit “Pije alkoolike e duhan” pësoi një rënie të lehtë. Ai ishte 1.1 % nga 1.2% që shënoi një muaj më parë. Po ta krahasojmë me një vit më parë, treguesi është rreth 10 herë më i ulët. Në gusht 2011 indeksi i çmimeve të pijeve ishte 10.9%.
Grupi “Veshje, këpucë” pas një rënie të mëtejshme në muajin korrik, pësoi rritje të lehtë gjatë gushtit, duke qëndruar gjithsesi në vlera negative. Indeksi i çmimeve të këtij grupi ishte -2.3 % nga -2.7% që ishte një muaj më parë. Në gusht 2011, ky tregues ishte -2.5%.
Pas katër muajsh qëndrueshmërie, shenjat e rritjes vërehen edhe në çmimet e grupit “Qera, ujë, lëndë djegëse dhe energji” Indeksi i tij ishte 1.4% nga 1.3% që shënonte muajt e kaluar. Në gusht 2011, norma e rritjes ishte 2.4%.
Një tendencë rritëse jo të vogël paraqiti, sipas të dhënave zyrtare, indeksi i çmimeve të transportit. Në gusht ai arriti në 4.4% nga 4.1% që ishte në muajin korrik. Dy muaj më parë norma e rritjes ishte 3.2%.
Rritja e çmimeve të këtij grupi shërbimesh, i ndikuar më se shumti nga çmimet e karburanteve, mbetet gjithsesi nën nivelet e rritjes së një viti më parë. Sipas INSTAT, në gusht 2011, çmimet në transport shënuan rritje vjetore prej 5.5%.
Burimi:INSTAT