Hyrje daljet e shqiptarëve dhe të huajve, Tremujori II, 2013-10-14
Hyrjet e vizitorëve në Shqipëri në tremujorin e dytë 2013 janë rritur 11.8 për qind krahasuar me të njëjtën periudhë të vitit të kaluar, bëhet e ditur në Buletin Statistikor për periudhën prill-qershor të INSTAT.
Nga toka hyrjet e të huajve zënë 70.5 për qind të ndjekur nga hyrjet nga ajri dhe deti respektivisht me 23.5 dhe 0.5 për qind.
Daljet e shtetasve shqiptarë në tremujorin e dytë 2013 janë rritur 23.7 për qind krahasuar me të njëjtën periudhë të vitit të kaluar, kryesisht ndikuar nga daljet nëpërmjet pikave kufitare tokësore.
INSTAT, për qëllime të statistikës së turizmit, me termin “vizitor” nënkupton “një person që udhëton në një vend të ndryshëm nga vendi ku ai banon, për një periudhë më pak se 12 muaj dhe qëllimi kryesor i këtij udhëtimi në vendin e vizituar nuk është ai i një veprimtarie fitimprurëse”
Të dhënat e mëparshme, të publikuara nga Banka e Shqipërisë treguan se zëri i shpenzimeve të udhëtimeve në bilancin pagesave, që kryesisht janë paratë që shqiptarët shpenzojnë në udhëtimet e tyre jashtë ishte 465 milionë euro, me një rritje prej rreth 44 milionë euro, apo 10%, në raport me të njëjtën periudhë të vitit të kaluar.
Në të kundërt, të ardhurat nga udhëtimet, që janë kryesisht hyrjet nga turistët, arritën në 398 milionë euro në 6 mujorin e parë 2013, duke shënuar një rënie me 33 milionë euro, apo 7.5%.
Burimi; INSTAT