Gjermania, hua 25 mln euro për ngrohje dhe infrastrukturë
Arrihet marrëveshje prej 25 milionë eurosh mes Gjermanisë dhe Kosovës. Kjo marrëveshje, e cila u nënshkrua nga ministri i Financave, Avdullah Hoti, dhe Ambasadorja e Gjermanisë në Kosovë, Angelika Viets, për synim ka përmirësimin e kushteve të jetesës për kosovarët.
12 prej 25 milionë eurove janë kredi, të cilat do të shfrytëzohen për të përmirësuar rrjetin përçues, kurse, 13 milionë do të shfrytëzohen për përmirësimin e sistemit të ngrohjes Termokos dhe trajtimin e ujërave të zeza në komunën e Prizrenit, Gjakovës dhe Pejës, shkruan ‘Kosova Press’.
Pas nënshkrimit të marrëveshjes, ministri Hoti tha se qeveria e Gjermanisë deri më sot ka dhënë ndihma të vazhdueshme për Kosovën, të cilat kapin vlerën prej 450 milionë eurove.
……………..
Brezovica, kontrata nis zbatimin në tetor
Parashikohet që në muajin e ardhshëm të fuqizohet kontrata e nënshkruar ndërmjet qeverisë së Kosovës dhe konsorciumit “MDP Consulting – Compagnie des Alpes” për Brezovicën. Qeveria në mbështetje me USAID-in, është në proces të përfundimit të detyrimeve që dalin nga kontrata, në anën tjetër edhe investitori në takimet e fundit ka deklaruar së është duke punuar sipas planit në përmbushjen e detyrimeve që dalin nga kontrata për partnerin, shkruan ‘Kosova Press’.
Qeveria më 14 prill të këtij viti pati nënshkruar kontratën për Partneritet Publik Privat 99-vjeçar për dizajnimin, ndërtimin, financimin, operimin dhe mirëmbajtjen e Qendrës Turistike në Brezovicë.
Koncepti për zhvillim të këtij projekti përfshin zhvillimin fleksibël për të plotësuar nivelet e kërkesës dhe parashikon një shumë prej 410 milionë eurosh investime në infrastrukturë gjatë kohëzgjatjes së projektit.
165 milionë euro investime kapitale në përmirësime në tre vjetët e para. 7000 mijë shtretër të shtrira në tre fshatra dhe të lidhura me rrugë dhe transport. Angazhim i fortë për qëndrueshmërinë e mjedisit. Pritshmëria e krijimit të mbi 3 mijë vendeve të punës, përveç punëve të përkohshme që lidhen me ndërtimin.