BE fillon veprimet ligjore kundër prodhuesit të vaksinave AstraZeneca

27/04/2021 10:44 AM 0 komente

Dega ekzekutive e Bashkimit Europian deklaroi se ka nisur veprime ligjore kundër prodhuesit të vaksinave të koronavirusit AstraZeneca për mosrespektimin e kushteve të kontratës së saj me bllokun prej 27 vendesh .

Vaksina AstraZeneca ka qenë baza në fushatën e imunizimit të Europës dhe një ndërlidhje në strategjinë globale për të çuar vaksinat në vendet e varfëra. Por ritmi i ngadaltë i dërgesave ka zhgënjyer europianët dhe ata e kanë konsideruar kompaninë pjesërisht përgjegjëse për shtyrjen e shpërndarjes së vaksinave.

Zëdhënësi i Komisionit Europian Stefan De Keersmaecker tha se Brukseli filloi veprimin ligjor kundër AstraZeneca javën e kaluar “në bazë të shkeljeve të marrëveshjes së paradhënies së blerjes”. Ai tha se arsyeja për veprimin ligjor ishte se “disa kushte të kontratës nuk janë respektuar” dhe se “kompania nuk ka qenë në gjendje të dalë me një strategji të besueshme për të siguruar një shpërndarje në kohë të dozave”.

Kontrata e AstraZeneca me BE-në, e cila u nënshkrua nga Komisioni në emër të vendeve anëtare gushtin e kaluar, parashikoi një fillim me 300 milionë doza për shpërndarje midis vendeve anëtare, me një opsion për edhe 100 milionë doza të tjera.

Prodhuesi i ilaçeve britaniko-suedeze kishte shpresuar të jepte 80 milionë doza të kësaj në tremujorin e parë të 2021, por vetëm 30 milionë u dërguan. Sipas Komisionit, kompania ka thënë se do të sigurojë 70 milionë doza në tremujorin e dytë, në vend se 180 milionëve që kishte premtuar. AstraZeneca tha në një deklaratë se ajo “i vjen keq” për vendimin e Komisionit për të ndërmarrë veprime ligjore dhe se ajo “do të mbrojë fort” veten e saj në gjykatë.

“Ne besojmë se çdo proces gjyqësor është pa meritë dhe ne e mirëpresim këtë mundësi për të zgjidhur këtë mosmarrëveshje sa më shpejt të jetë e mundur”, tha AstraZeneca. Ai tha që dërgesat po përmirësohen “pas një viti të vështirë zbulimesh shkencore, negociatash shumë komplekse dhe sfidave të prodhimit”.

“Ne jemi duke bërë progres duke u përqendruar tek sfidat teknike dhe prodhimi ynë po përmirësohet, por cikli i prodhimit të një vaksine është shumë i gjatë, që do të thotë se këto përmirësime kërkojnë kohë për të dhënë rezultatin final që është rritje e dozave të vaksinave të përfunduara”, tha kompania.

Ajo tha gjithashtu se dëshiron të vazhdojë “të punojë në mënyrë konstruktive me Komisionin e BE-së për të vaksinuar sa më shumë njerëz të jetë e mundur. Mijëra prej punonjësve tanë që punojnë gjatë gjithë kohës janë nxitur nga një pasion për të ndihmuar botën pa përfitime”.

Vaksina AstraZeneca është më e lirë dhe më e lehtë për t’u përdorur sesa vaksinat rivale nga Pfizer dhe Moderna dhe është miratuar për përdorim në mbi 50 vende, përfshirë BE-në me 27 vende dhe Organizatën Botërore të Shëndetësisë. Autoritetet amerikane janë ende duke e vlerësuar këtë vaksinë.

Komisioni ka kritikuar publikisht kompaninë në disa raste, dhe muajin e kaluar ajo paraqiti një mekanizëm për zgjidhjen e mosmarrëveshjeve. Brukseli tha se fokusi i tij është të sigurojë shpërndarjen në kohë të vaksinave. Që atëherë u shpreh se opsioni i tij për doza shtesë të AstraZeneca nuk do të merret parasysh.

Javën e kaluar, Presidentja e Komisionit, Ursula von der Leyen njoftoi se një kontratë e re vaksine është vendosur të lidhet me BioNTech-Pfizer për 1.8 miliardë doza për periudhën 2021-23. Ajo tha se marrëveshja do të sigurojë doza për vaksina të përshtatura ndaj varianteve të reja dhe, potencialisht, vaksina për fëmijë dhe adoleshentë.

Von der Leyen tha se BE-ja, shtëpia e rreth 450 milionë njerëzve, ka marrë tashmë 123 milionë vaksina” dhe është në rrugën e duhur që të ketë vaksinuar 70% të të gjithë të rriturve deri në korrik. Më parë objektivi kishte qenë muaji shtator./Associated Press

Komente

avatar
  Subscribe  
Notify of