Shqipëria në EXPO 2020 DUBAI
EXPO 2020 Dubai
Dubai do të shndërrohet për gjashtë muaj me radhë në shtëpinë e miliona vizitorëve dhe bizneseve nga e gjithë bota, të cilët do të vizitojnë ekspozitën botërore “Expo 2020 Dubai”.
Pas EXPO Milano 2015, Zyra Ndërkombëtare e Ekspozitave (BIE) vendosi që vendi mikpritës për panairin e radhës ndërkombëtar të vitit 2020 të jetë Dubai në Emiratet e Bashkuara Arabe, duke u bërë expo e parë botërore që mbahet në Lindjen e Mesme, Afrikë dhe Azinë Jugore.
EXPO 2020 Dubai do të mbledhë mbi 190 shtete, me një numër rekord pjesëmarrësish në të gjithë historinë e Expo-s dhe për herë të parë, me përfaqësim individual të çdo vendi, nga ku shtetet do të kenë mundësi që gjatë periudhës 20 tetor 2020 – 10 prill 2021 të ekspozojnë arritjet e tyre në fusha të ndryshme.
Me më shumë se 25 milionë vizitorë që priten të prekin skenën e saj, 70% të të cilëve të huaj nga rajoni dhe e gjithë bota, EXPO 2020 Dubai synon të kthehet në një destinacion global për të gjithë, duke u bërë EXPO më e vizituar ndërkombëtarisht.
“Connecting Minds, Creating the Future” është filozofia kryesore e Expo 2020 Dubai, e cila nëpërmjet inovacionit dhe progresit, synon të sjellë më afër kombet dhe njerëzit përmes bashkëpunimit dhe partneriteteve.
EXPO 2020 Dubai do të ofrojë një platformë që nxit kreativitetin, inovacionin dhe bashkëpunimin ndërkombëtar, për të adresuar nevojat e shumta globale, duke pasur ndikim të qëndrueshëm në rrugën e përparimit njerëzor.
Ky edicion i EXPO-s do të ketë tri prioritete: Opportunity, Mobility, Sustainability, si kryefjalë të progresit që lidhin njerëzit, organizatat, bizneset dhe shtetet në përpjekjet e tyre për të krijuar një të ardhme më të mirë.
Zhvillimi i EXPO 2020 Dubai përkon me përvjetorin e pesëdhjetë të themelimit të Emirateve të Bashkuara Arabe, duke festuar udhëtimin gjysmëshekullor të këtij vendi drejt zhvillimit njerëzor dhe ekonomik, si dhe duke shënuar edhe rastin e parë që një event i tillë organizohet nga një vend arab.
Dubai, si vendi mikpritës, mishëron më së miri këtë zhvillim, duke u kthyer në një qendër të rëndësishme globale, ku kultura dhe popuj të ndryshëm jetojnë dhe punojnë së bashku për arritjen e qëllimeve të përbashkëta. Me një infrastrukturë dhe arkitekturë të klasit botëror, teknologji të avancuar dhe inovacion, si dhe me rreth 200 kombësi që jetojnë dhe punojnë në Dubai, qyteti shërben si pikë ndërlidhëse për njerëzit, kombet, idetë, mallrat, institucionet dhe bizneset.
Shqipëria në EXPO 2020 Dubai
Pjesëmarrja në Expo 2020 Dubai përbën herën e pestë që Shqipëria merr pjesë në një panair të tillë, që prej vitit 1937 në Paris ku vendi ynë regjistron pjesëmarrjen e tij të parë, për të vijuar me pjesëmarrjen më të fundit në EXPO 2015 të mbajtur në Milano.
Vizita në Dubai në datën 30 Maj 2019 e Drejtorit Ekzekutiv të Agjencisë Shqiptare të Zhvillimit të Investimeve (AIDA), z. Sokol Nano, në rolin e Komisarit të Përgjithshëm të Shqipërisë në EXPO 2020 Dubai dhe nënshkrimi i kontratës së pjesëmarrjes së Shqipërisë, i hap rrugë përgatitjes së vendit tonë për t’ju bashkuar EXPO 2020 Dubai.
Pjesëmarrja e vendit tonë në një event të këtyre përmasave, do të shërbejë si një mundësi e rëndësishme për promovimin e Shqipërisë si një destinacion i veçantë dhe i qëndrueshëm turistik, duke shpalosur bukuritë e vendit tonë, kulturën dhe traditën e pasur shqiptare. Një nga objektivat kryesorë do të jetë padyshim promovimi i Shqipërisë si një partner i besuar tregtar dhe i investimeve të huaja në një sërë sektorësh të rëndësishëm për vendin si energjia, turizmi, infrastruktura, bujqësia, etj.
Pavijoni ynë do të jetë simbol i identitetit kombëtar, duke pasqyruar një Shqipëri me ngjyra, të re dhe dinamike, e cila ofron një destinacion mjaft tërheqës turizmi dhe në të njëjtën kohë një destinacion për investime të huaja, duke evidentuar avantazhet dhe potencialet që Shqipëria mbart, si dhe duke reflektuar filozofinë dhe prioritetet e EXPO 2020 Dubai.
Pavijoni shqiptar do të jetë i vendosur në një nga zonat kyçe të EXPO-s, në zonën “Mobility”, e cila ka në fokus krijimin dhe prezantimin e urave lidhëse fizike dhe virtuale produktive për lëvizjen e njerëzve, mallrave dhe ideve, duke siguruar qasje më të lehtë në tregje, njohuri dhe inovacion.
AIDA së bashku me Ministritë e linjës po përgatisin kalendarin me një sërë aktivitetesh dhe takimesh mbi ekonominë, investimet, turizmin, kulturën, arsimin, artin, kulinarinë etj., të cilat do të mbahen gjatë periudhës gjashtëmujore të EXPO-s, duke i dhënë gjithashtu një peshë të rëndësishme edhe të rinjve shqiptarë dhe talenteve tona nëpër botë. Gjithçka do të kulmojë me Ditën Kombëtare të Shqipërisë në datën 9 mars 2021, ku e gjithë vëmendja e EXPO-s do të jetë te Shqipëria. Kjo ditë do t’i kushtohet kryesisht aktiviteteve kulturore për të festuar identitetin kombëtar, duke shpalosur përpara një audience të gjerë ndërkombëtare, historinë, traditën dhe kulturën e vendit tonë, si dhe potencialet e jashtëzakonshme turistike dhe ekonomike që Shqipëria ofron.
Gjatë EXPO-s, pavijoni shqiptar pritet të tërheqë një sërë vizitorësh, nga ata kureshtarë për të njohur më mirë vendin tonë, te përfaqësues të bizneseve dhe delegacione zyrtare të shteteve, me qëllim ndërtimin dhe forcimin e urave të bashkëpunimit të ndërsjellë.
Një vëmendje e rëndësishme do t’u kushtohet bizneseve, me një hapësirë të veçantë të pavijonit shqiptar, takimeve me biznese dhe investitorë, të cilët do të mund të njihen mbi mundësitë për investime dhe për të bërë biznes në Shqipëri. Me më tepër se 20% të pjesëmarrësve nga biznese dhe institucione qeveritare, EXPO 2020 Dubai, ndër të tjera, do të shërbejë si një mundësi e shkëlqyer për vendin tonë për tërheqjen e investimeve të huaja dhe krijimin e partneriteteve midis kompanive shqiptare dhe atyre të huaja.
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.