Tregtia sipas grupmallrave janar-mars
Gjatë periudhës janar-mars të këtij viti, pesha e tregtisë së grupmallrave kryesore pësoi luhatje të lehtë krahasuar me të njëjtën periudhë të një viti më parë. Grupi i mallrave “Minerale, lëndë djegëse dhe energji elektrike” pësoi ulje të lehtë në peshën e eksporteve (1 pikë përqindje) krahasuar me të njëjtën periudhë të vitit 2011. Rënie të theksuar në peshë shënoi grupi i mallrave “Materiale ndërtimi dhe metale”. Ai ra 7 pikë përqindje ndërsa “Tekstile dhe këpucë” e rritën peshën me 3 pikë përqindje.
Në importe luhatjet janë më të dukshme brenda disa grupmallrave. Sipas të dhënave të Institutit Shqiptar të Statistikave (INSTAT), pesha e importit të grupit “Makineri, pajisje dhe pjesë këmbimi” ishte e njëjtë, ndërsa vlera e tyre pësoi rritje të lehtë. Në tremujorin e parë u importuan 12.5 miliardë lekë makineri e pajisje ose 1.6% më shumë se e njëjta periudhë e vitit 2011.
Grupi i mallrave “Minerale, lëndë djegëse dhe energji elektrike” e rriti peshën në importe me 8 pikë përqindje, duke zënë një volum importi sa dy herë importet e materialeve të ndërtimit e metalet. “Ushqime, pije e duhan ruajti të njëjtën peshë me një vit më parë, ndërsa vlera e importit ra 1.5% krahasuar me tre muajt e parë 2011.
Në eksporte, grupi më i madh i mallrave “Tekstile dhe këpucë” u rrit në peshë, ndonëse pati rënie të lehtë të vlerës së tyre. Sipas të dhënave të INSTAT-it, vlera e eksportit të këtij grupmallrash ishte 15.79 miliardë lekë, ose 3.5% më pak se e njëjta periudhë e vitit të kaluar.
“Ushqime, pije e duhan” u rrit me 2 pikë përqindje në peshën e eksporteve (duke arritur në 6%), ndërkohë që vlera eksportit u rrit 20%.
Dy grupet e mallrave me peshën më të madhe në tregti “Tekstile dhe këpucë”, “Minerale, lëndë djegëse dhe energji elektrike”, në këtë periudhë paraqiten në vlera më të ulëta në eksporte, ndërsa në importe u rritën vetëm mineralet.
Sipas të dhënave të INSTAT-it, vlera e eksportit dhe importit të grupit “Tekstile dhe këpucë” ra përkatësisht 3% dhe 1%. Për grupin “Minerale, lëndë djegëse dhe energji elektrike”, vlera e eksportit ra 8%, kurse ajo e importit u rrit rreth 43%.
Burimi: INSTAT