Në një treg pune të ndërlikuar si ky i kohëve të sotme është e vështirë të fitosh vendin e punës së dëshiruar. Pengesat përgjatë rrugës janë të shumta, por jo gjithnjë lidhen me CV-në.
Shpesh, pavarësisht viteve përvojë dhe aftësive teknike të fituara, punonjësit hasin pengesa që të promovohen në pozicione më të larta, për shkak të shefave të tyre. Drejtues të paaftë, të cilët nuk janë trajnuar në mënyrë të përshtatshme për të koordinuar ekipin e tyre të punës, por edhe drejtues që kanë frikë nga promovimi i të rinjve më të kualifikuar dhe të shkathët se ata.
“Ata bëjnë kaq shumë gabime, sa jo vetëm dëmtojnë kompaninë por ‘ndëshkojnë’ edhe aspiratat e punonjësve të aftë e të vendosur, shpjegon për Business Insider, Nicola Uva, senior director Emea i ADP, kompani shumëkombëshe, lider në Human Capital Management. Rezultati? “Të rinjtë arratisen sepse shohin se përpara rritjes profesionale ka një bllokadë dhe kështu, zgjedhin të largohen”.
Një studim i realizuar nga Adp “Workforce View in Europe 2019” u përpoq të analizojë këtë dinamikë. Kërkimi mori në analizë më shumë se 10 mijë punonjës në Francë, Gjermani, Itali, Holandë, Poloni, Spanjë dhe Mbretëri e Bashkuar.
Një nga shkaqet më të mëdha të joproduktivitetit të punonjësve është pikëirisht paaftësia e drejtuesve.
“Nuk po flasin për personat që drejtojnë një shoqëri, CEO-t – thotë Nicola Uva. Ne u referohemi team leader, d.m.th. ata persona që drejtojnë grupe pune, departamente, të cilët çdo ditë janë në kontakt me burimet që koordinojnë”.
“Mund të ndodhë që një drejtues të jetë i aftë të krijojë një produkt, ta realizojë apo ndoshta të gjejë mënyrat më të mira për ta komunikuar apo për t’i bërë reklamë. Por ai mund të mos jetë i aftë të drejtojë një grup pune, i cili duhet të kryejë gjithë këto procese dhe funksione” – thotë eksperti i ADP.
Si rezultat ata bëjnë shumë gabime dhe injoranca e tyre drejtuese pengon dëshirën e rritjes së punonjësve, edhe atyre të vetëdijshëm për aftësitë e tyre. Paaftësia e menaxherëve nxit punonjësit brilant të lënë vendin e punës për një më të mirë.
“Kjo ndodh te një shtresë e caktuar e popullsisë, njerëz të cilët kanë një master apo doktoraturë, me pritshmëri punësimi mjaft të larta – vijon më tej senior director i ADP. Atyre nuk u duhet shumë kohë për të ndryshuar kur ndeshen me një shef ‘injorant’ (në kuptimin që ka mungesë aftësish menaxheriale), i cili nuk njeh dhe nuk i pranon pritshmëritë e tyre”.
Gabimet tipike të një drejtuesi të paaftë
Mungesa e përvojës dhe e formimit të përshtatshëm mund të bëhet shkaktare që shefi të bëjë disa gabime të zakonshme. Së pari, ndonjëherë mungesa e ndjeshmërisë, pra ai nuk arrin të kuptojë pritshmëritë e rritjes së punonjësve që punojnë për të.
“Ai nuk arrin t’u japë përgjigje të kënaqshme punonjësve që i kërkojnë këshilla për t’u rritur dhe për t’u formuar, për të kuptuar se çfarë duhet të bëjnë për të dhënë një kontribut më shumë në kompaninë në të cilën janë punësuar e ndoshta në të ardhmen të kryejnë një rol tjetër, më të rëndësishëm dhe më shpërblyes” – thekson Nicola Uva.
Pastaj ekziston frika ndaj të tjerëve: team leader mund t’u frikësohet ambicieve dhe aftësive të personave që punojnë për të në ekipin e tij dhe kështu vendosin t’u presin krahët.
Një tjetër arsye është frika nga ndryshimi: ai nuk dëshiron të ndryshojë mënyra e organizimit dhe realizmit të punës. Në këtë mënyrë ai i zgjedh bashkëpunëtorët, mbi të gjitha duke u mbështetur te aftësitë personale dhe më pak tek aftësitë profesionale. “Ata kanë tendencën të qëndrojnë në zonën e komfortit dhe i kanë frikë ndryshimet”.
Për të shmangur rënien në këto gracka, thotë në fund eksperti i ADP, drejtuesit potencialë duhet të studiojnë dhe të pajisjen me aftësi të ndryshme.
“Si menaxhohet leadershipi dhe dinamikat e një grupi, si përcaktohen objektivat, si zgjidhen konfliktet brenda një ambienti pune, si dëgjohen nevojat e punonjësve”.
Ata gjithashtu duhet t’i kushtojnë kohë mënyrës se si të drejtojnë dhe të koordinojnë ekipin e tyre, pasi vetëm me përvojë dhe me përpjekjet e duhura mund të jeni një shef më i mirë”…
*Marco Cimminella
Burimi: Business Insider