Banka Ndërkombëtare për Rindërtim dhe Zhvillim (IBRD, pjesë e Bankës Botërore) dhe përfaqësues të qeverisë shqiptare duket se kanë nënshkruar një marrëveshje kredie prej 110.8 milionë eurosh e cila do të destinohet për politikat e zhvillimit.
Marrëveshja e publikuar nga BB mban datën 28 gusht dhe parashikon kredinë “Rezistenca e parë në Shqipëri dhe Zhvillimi i Gjelbër- Hua e Politikave të Zhvillimit”.
Por cili është objektivi i kësaj kredie 110.8 milionë euro, e cila do të disbursohet me një transh?
Referuar shpjegimeve që bëhen në një seksion të veçantë të marrëveshjes, kredia do të mbështesë tre shtylla.
Shtylla e parë është forcimi i rezistencës së qeverisë dhe të familjeve.
E shtjelluar më gjerë, kjo përfshin nismën për zgjerimin e bazës së taksës, së dyti përmirësimi i pasqyrimit të riskut fiskal në buxhetin e shtetit duke nënkuptuar ekspozimin e këtij të fundit ndajnë fatkeqësive natyrore dhe masave që adresojnë këtë.
Po kështu rritja e rezistencës ndaj ndryshimeve klimatike në sektorin e investimeve publike ku do të zhvillohet një vlerësim për këtë. Në finale edhe përmirësimi i efektivitetit dhe përfitimeve të paaftësisë.
Në shtyllën e dytë është forcimi i kuadrit të tregut të energjisë dhe rritja e pjesës së energjisë nga burimet e rinovueshme dhe eficienca e energjisë.
Në këtë aspekt, marrëveshja sjell në vëmendje ligjin e ri për burimet e rinvoueshme që është miratuar tashmë ndërkohë dhe synimet për diversifikim të sektorit.
Një tjetër element që do të mbështetet është promovimi i një tregtimi energjie transparente dhe në formë konkurruese teksa tashmë ka nisur nga funksionimi që nga muaji prill edhe Bursa Shqiptare e Energjisë. Lidhur me eficiencën kredia parashikon nxitjen e sektorit publik për të shkuar më shumë drejt projekteve që kursejnë energji, një tregues ku ende Shqipëria mbetet me arritje modeste.
Për sa i takon sektorit të energjisë, kjo nuk është mbështetja e parë që qeveria merr nga bankat. Më herët, ishte një kredi për rimëkëmbjen e sektorit teksa një tjetër kredi e BERZH po mbështet kompaninë e shpërndarjes.
Shtylla e tretë që do të mbështetet nga kredia është ajo për mbrojtjen e mjedisit dhe reduktimin e karbonit.
Sipas kalendarit që përfshin marrëveshja, qeveria parashikohet që të nisë ripagimin e kësaj kredie tek Banka Botërore në vitin 2028 deri në vitin 2040./ N.Maho
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.