Shteti që realisht funksionon duke instaluar aplikacionin “çkemi vllai”
Kohët e fundit, veshët po na bëjnë shumë zhurmë nga inflacioni i leksioneve për shtetin dhe se si qytetari do të duhet me qetësi (biles edhe të mos bërtasë fort!) të kërkojë të drejtat e tij, se ndryshe ndaj tij do të veprojë forca e ligjit.
Na është tundur Kushtetuta, na janë treguar Ligje, Nene, Paragrafë, Rregullore dhe Procedura për të na bindur se kush ka të drejtë në këtë vend.
Ndjesë të respektuar lexues për këtë parantezë ankese bazike qytetare, por për ne, kuptimi i një shteti në demokraci dhe funksionet e tij janë më të thjeshta sesa duan qëllimisht të na i komplikojnë: Populli Voton, Kuvendi miraton ligje, Presidenti Dekrete, Qeveria përmes Vendimeve ekzekuton, çdo nëpunës civil është i detyruar t’i zbatojë dhe në fund gjykata vendos, nëse çdo akt i tillë, i cilitdo Institucioni Shtetëror është i drejtë apo i padrejtë.
Dhe këto principe bazë nuk është se nuk i njeh qytetari e fshatari shqiptar! Edhe sikur të mos i mbante mend që nga koha kur shteti i pavarur shqiptar filloi të funksionojë i modeluar si një demokraci europiane, nga lavazhi i trurit që i bëri Diktatura Komuniste, këto 30 vjet të tranzicionit të pafund, të tilla principe janë ngulur tashmë në subkoshiencën e tij e nuk e vë njeri në dyshim faktin se ato janë baza e shoqërisë që duam të jetojmë në këtë vend!
Po atëherë, pse erdhëm në këtë pikë, sa në vend që të merremi me gjëra më të rëndësishme po flasim për filozofi mediokre, boshe, të zgërlaqura e të bëra pis mbi shtetin që po na shet politika?
Sepse përmes provave nga hetimi i bërë dhe që zotërohen nga vetë Institucioni i Akuzës, dëgjuam fare qartë, se ky shteti ynë, funksionuaka ndryshe në këtë model demokracie që është ndërtuar në këtë vend!
Me lek, urdhra apo kërcënime në celularë sigurohen vota, me SMS emërohen dhe shkarkohen nëpunës të rendit, të arsimit apo fushave të tjera. Me statuse në rrjetet sociale vendoset për ligje.
Një qeverisje digjitale është trend i diktuar nga zhvillimet teknologjike dhe interneti. E-goverment, E-book, E-commerce, etj., janë zhvillime të reja, të cilat i kemi mësuar tashmë dhe i kemi pritur me entuziazëm, pasi kryesisht kanë synim të rritin transparencën e llogaridhënien.
Por, në asnjë rast, në asnjë vend të botës ku janë zhvilluar këto forma të qeverisjes moderne, institucionet nuk janë zëvendësuar me aplikacionet e politikës me titullin: “çkemi vllai”.
Këtu në Shqipëri shteti ynë digjital dhe diskret po zëvendëson me ritme të shpejta shtetin real dhe transparent. Vendin e ligjeve e zënë tekst-message, drejtësinë e vendosin followers dhe nëpunësit i kanë shndërruar brutalisht në Emoji.
Pra, kemi një shtet E-qesharak, që po na shemb demokracinë duke iu hequr të drejtën shqiptarëve të gëzojnë në mënyrë të barabartë të drejtat, e që po në mënyrë të barabartë kanë të drejtë të jetojnë në paqe dhe siguri, tipare këto që i garanton një shtet i vërtetë.
Si përfundim, këto ditë mësuam se kemi dy shtete: një fasadë që duhet të ishte i vërteti dhe një shtet me brendi të kalbur që qeveriset me SMS.
Por, ky model i bukur nga jashtë e i shëmtuar nga brenda mund të tërheqë për ca kohë vetëm turistët, por nuk i gënjen dot më shqiptarët që po emigrojnë çdo ditë dhe masivisht, si dikur në fillimet e demokracisë.